Xitay amérikining kishilik hoquqi sahesidiki tenqidini ret qildi

Xitay, amérikining béyjingdiki bash elchixanisining xitay kishilik hoquqi xatirisidiki chékinishke qaratqan tenqidini, bolupmu xitay kishilik hoquq pa'aliyetchilirining zerbige uchrawatqanliqigha qaratqan tenqidini ret qilip, amérika elchixanisining tenqidi jonggoning ichki ishlirigha arilishidighan, qarshi élinmaydighan heriket, dep körsetti.

Xitay terepning inkasi béyjingdiki amérika elchixanisining aldinqi küni bayanat élan qilip, eydiz pa'aliyetchisi xu jyani öz ichige alghan öktichi zatlarni qolgha élishni toxtitish, siyasiy mehbuslarni qoyuwétish toghrisidiki chaqiriqigha jawaben élan qilindi. Xitay tashqi ishlar ministirliki bayanatchisi jyang yüy bu heqtiki bayanatida “Beziler kishilik hoquqni bahane qilip, jonggoning ichki ishlirigha arilashmaqchi boliwatidu. Biz buninggha qet'iy qarshi turimiz. Jonggo kishilik hoquqni hörmet qilidu”, dep tekitligen. Amérikining béyjingdiki bash elchixanisining bayanatchisi suzan stéwénsin aldinqi küni roytérs agéntliqigha bergen bayanatida amérikining eydiz pa'aliyetchisi xu jyani qolgha élish, muxbirlar, öktichiler hem kishilik hoquqni qoghdighuchi adwokatlarni tutqun qilish weqeliridin bi'aram bolghanliqini eskertip, “Bu heriketler..... Adwokatlar, muxbirlar we puqralar hoquqini qoghdighuchi shexslerni nishan'gha élishning küchiyiwatqanliqini körsetmekte”, dégen idi.

Suzan stéwénsin yene “Biz xitayni bu türdiki qolgha élish, tutqun qilish heriketlirini toxtitip, tutqundiki yaki türmidiki siyasi mehbuslarni qoyuwétishke chaqirimiz,” dep eskertidu. Suzan stéwénsin bu sözlerni amérikining mu'awin dölet sékritari jon nigriponti xitay bilen istratégiyilik söhbet ötküzüsh üchün xitaygha kelgen mezgilde tekitligen bolup, peyshenbe küni nigriponti xitay tashqi ishlar ministiri yang jyéchi bilen aldinqi küni körüshkende kishilik hoquqni otturigha qoyghanliqini ilgiri sürdi. Lékin , jyang yüy muxbirlargha kishilik hoquqning muzakire qilin'ghanliqini ret qilip, “Charshenbe kündiki söhbette bu mesililer otturigha qoyulmidi,” deydu. (Erkin)