Xitay da'iriliri xu yawbang tughulghanliqining 90 yilliqini xatirileydu

Merkizi axbarat agéntliqining xewer qilishiche, béyjing da'iriliri xitay kompartiyisining sabiq bash sékritari xu yawbang tughulghanliqining 90 yilliqini xatirileshke teyyarliq qilmaqta. Xewerlerge qarighanda xu yawbangni xatirilesh pa'aliyiti béyjingda we uning yurtida ayrim - ayrim yuqiri derijiliklerge xas iltipat bilen ötküzülmekchiken.

Xu yawbang 1987 - yili burzhu'a erkinleshtürüshni yolgha qoydi, dégen qalpaq bilen wezipisidin élip tashlan'ghan. U, kompartiye tarixidiki eng libiral rehberlerning biri idi. U, 1980 - yillarning bashlirida Uyghur aptonom rayonini ziyaret qilip, merkezning tibet siyasitini Uyghurlargha yüzgüzse bolidu, dep tekitligen.

Xu yawbangning eyni chaghdiki siyasiti boyiche, "shinjangdiki pen - téxnika xadimlirini hésabqa almighanda, yurtigha qaytishni xalaydighan xitay puqralirining kétishige yol qoyush, shinjangdiki xitaylar 2 - sepke chékinish kérek" idi. Emma xu yawbangning bu sözi, Uyghur aptonom rayoni we béyjingdiki qattiq qollarni ghezeplendürgen. Xu yawbang 1987 - yili wezipisidin élip tashlan'ghanda, da'iriler uni milliy mesililerni bir terep qilishta éghir sewenlik ötküzdi, dep eyibligen.

Xu yawbang 1989 - yili 4 - ayning 15 - wapat bolghanda uninggha matem bildürüsh pa'aliyiti oqughuchilar herikitige özgergen. Xitay kompartiyisi hazirghiche xu yawbangni ashkare xatirilesh pa'aliyiti ötküzüp baqmighan. (Erkin)