Xitay kompartiyisi jiddiy ijtima'iy mesililerge duch kelmekte

Xitay yashlar géziti teripidin élip bérilghan bir ray sinash netijisige qarighanda, xitay puqralirining 80 pirsentidin köpreki, xitayda künséri köpiyiwatqan tapawet perqini, xitaydiki eng jiddiy mesile dep qaraydiken hemde hökümettin buni tézdin bir terep qilishini telep qilidiken.

1970‏- Yillarning axiriliri xitayda bashlan'ghan iqtisadiy islahat gerche xitayning iqtisadiy jehettin téz tereqqiy qilishigha hemde yüz milyonlighan xitay puqralirining namratliqtin qutulushigha seweb bolghan bolsimu, emma iqtisadiy islahat netijiside xitayda namratlar we baylar otturisidiki tapawet perqining künséri köpiyishi ijtima'iy muqimsizliqqa seweb bolup, kompartiyining hakimiyitige tehdit qilmaqta.

Xitay hökümiti teripidin élan qilin'ghan statistikilargha qarighanda, xitaydiki pütün xususi mülükning 40 pirsenti xitaydiki eng bay on pirsent a'ilining igidarchiliqida iken. Halbuki xitaydiki eng namrat 10 pirsent a'ile xitaydiki bayliqning peqet ikki pirsentige ige iken.

Xitay döletlik statistika idarisining bildürüshiche, ötken yil béyjing shehiride turushluq bir kishining ottura hal ayliq mu'ash 365 dollar iken. Béyjing we shangxeydiki bir kishining ayliq kirimi xitay yéziliridiki ishchilarning bir yilliq kirimige toghra kélidiken.

Bu arida xitay kompartiyisi düshenbe küni, chiriklik mesilisining künséri jiddiylishiwatqanliqini bildürüp, partiye ezalirining chiriklikke qarshi küreshni jiddiy dawamlashturushini eskertti.

Xewerlerge qarighanda, xitaydiki namratlar we baylar otturisida künséri köpiyiwatqan kirim perqi, chiriklik, kündin-kün'ge jiddiylishiwatqan ishsizlik, kompartiye rehberlirini qayghulandurmaqta. (Qanat)