Xitay partiye mektipi xitayda milliy ziddiyetlerning köpiyiwatqanliqini bildürdi

Xitay partiye mektipi teripidin peyshenbe küni élan qilin'ghan maqalide , xitayda milletler arisidiki munasiwetning inaq we muqim ikenliki tekilinish bilen birge , milliy ilminitlar tüpeyli her xil ziddiyetlik toqunushlarning küchiyip, herqandaq bir waqitta weqe sadir bolush éhtimalliqining barliqi otturigha qoyulghan.

Maqalide , 4 xil ziddiyet körsitilgen bolup, xelq'ara düshmen küchlirining tibetning diniy dahisi dalay lama bilen shinjang müsteqilliq teshkilatlirining pa'aliyitini qollawatqanliqi, xitayning sherqiy rayonliri bilen az sanliq milletler rayoni arisidiki perqning intayin chongluqi, milliy ilimintlar tüpeyli shekillen'gen ziddiyetler we milliy xizmettin shekillen'gen perqlerdin xitayda milliy toqunushning köpiyiwatqanliqi körsitilgen.

Maqalide yene , uzundin béri amérikini merkez qilghan xelq'ara düshmen küchlirining milliy, diniy, kishilik hoquq mesililirini qoral qilip, xitayning milletler arisidiki munasiwitige tesir yetküzüwatqanliqi tilgha élin'ghan.

Xelq'arada pa'aliyet élip bériwatqan Uyghur teshkilatliri bolsa, xitay hökümitining 50 yildin buyan Uyghurlar üstidin basturmichiliq siyasiti yürgüzüp kéliwatqanliqini tekitlep, özlirining ma'arip, medenyet , diniy we kishilik hoquq jehette qattiq depsendichilikke duch kéliwatqanliqini bildürmekte.

Xitay hökümiti , Uyghur milliy herikitining siyasiy yétekchisi rabiye qadir xanimni xelq'ara düshmen küchler bilen birliship, aghdurmichiliq heriketliri bilen shughulliniwatidu dep eyibligen idi. Emma xelq'ara kishilik hoquq teshkilatliri rabiye qadir xanimning pa'aliyetlirige yuqiri baha bermekte. Rabiye qadir xanim xitay türmisidiki chéghidila " rafto kishilik hoquq mukapati " bilen teghdirlendi , u yene dunya nobil ténchliq mukapatining küchlük namzatliridin biri bolup bahalandi. (Eqide)