Xitay teywen boghizigha 800 din artuq bashqurulidighan bomba orunlashturdi

Xitay metbu'atining xewer qilishiche, teywen boghizida weziyetning keskinlishishi bilen birge, béyjing rehberliri, xitay armiyisige teywenning musteqilliqining aldini élish üchün kéreklik teyyarliqlarni tézlitish toghrisida buyruq chüshürgen.

Xitay xelq armiyisi gézitining xewer qilishiche, xitay merkiziy herbiy ishlar komitétining mu'awin re'isi général go beyshyung, xitay xelq qurultiyining yilliq yighinida bergen bayanatida, barliq charilerni qollinip teywenning musteqilliqini élan qilishining aldini alidighanliqini bildürüp, biz teywenning musteqilliqigha qet'i qarshi turimiz, teywen musteqilliq küchlirining teywenni chong quruqluqtin ayriwitishige yol qoymaymiz, dégen.

Xewerde éytilishiche, général go, bizning asasliq wezipimiz chin shüybyenning teywenning musteqilliqi toghrisidiki pa'aliyetlirige qarshi turup, bu pa'aliyetlerni tosushtin ibaret, dégen.

Xitay mudapi'e ministiri saw gangchü'enmu, chin shüybyenning döletni birlikke keltürüsh komitétini bikar qilish qararini qattiq tenqid qilip, bu, teywenning qanuniy musteqilliqi yolida tashlan'ghan xeterlik bir qedem, dédi. U xitay armiyisining urush teyyarliqini tézlitidighanliqini bildürdi.

Bu arida, teywen mudapi'e ministirliqi, xitay hökümitining teywen etrapigha 800 ge yéqin bashqurulidighan bomba orunlashturghanliqini bildürdi. Teywen mudapi'e minstirliqi xadimlirining éytishiche, xitay bu bashqurulidighan bombiliri arqiliq, teywen boghizida urush partlisa, teywenni pütünley qamal qilalaydiken.

Lékin, bezi xewerlerge qarighanda, teywen mudapi'e ministirliqi, amérikidin ilghar téxnikiliq qorallar sétiwélish pilanini emelge ashurush üchün, meqsetlik halda xitay herbiy tehditini jiddiy qilip körsetmekte. (Qanat)