Икки йиғин мәзгилидә өй, хизмәт вә маарип мәсилиси амма әң көңүл бөлидиған мәсилиләр икән

Хитай шинхуа ториниң хәвәр қилишичә, бу йил 3 ‏- айниң бешида бейҗиңда өткүзүлидиған хәлқ қурултийи вә сиясий кеңәш йиғинлири һарписида, хитай җәмийәт тәкшүрүш оргини хитайниң 16 шәһиридә икки йиғинни чөридигән мәзмунларда пуқраларниң райини синаш паалийити елип барди.

Бултур 12 ‏- айда башланған, 2 миң киши тәкшүрүшкә қатнашқан мәзкур рай синаш нәтиҗисидин қариғанда, икки йиғин мәзгилидә кәң пуқралар әң қизиқидиған мәсилиләр ичидә, туралғу өй мәсилиси 75 % лик, ишсизлиқ мәсилиси 61 % лик вә маарип мәсилиси 52 % лик биләт билән муһим мәсилә дәп қаралған. Буниңдин қалса пуқраларниң давалиниш вә җәмийәт баравәрлики мәсилисиму алаһидә орун тутқан.

Амма инкас қилған вә һәл қилишқа тигишлик дәп қаралған мәсилиләр ичидә, базар риқабити тәңсизликидин шәкилләнгән бай ‏- кәмбәғәллик пәрқи, қанун саһәсидики қара көләңгиләр, кишиләрниң өз һоқуқини қоғдашта дуч келиватқан тосқунлуқлар, чириклик, маарип, давалиниш һәмдә деһқанлар мәсилиси қатарлиқлар асасий салмақни игиләйдикән.

Америкидики хитай җәмийәтшонаслириниң инкас қилишичә, амма инкас қилған юқиридики мәсилиләрниң хәлқ қурултийи һәмдә сиясий кеңәштәк органларниң йиғинида һәл қилиниши мумкин әмәс болуп, бу мәсилиләр җәмийәтниң омумйүзлүк наразилиқини қозғаватқан шундақла муқимсизлиқни пәйда қиливатқан мәсилиләр һесаблинидикән. (Илтәбир)