Хитай компартийиси 17 ‏- қурултийида алий рәһбәрлик оргиниға йеңи кишиләр сәплиниду

Бу йил күздә өткүзилидиған хитай компартийиси 17 ‏- қурултийиниң тәйярлиқ хизмәтлири әмәлийлишиш басқучида җиддий елип берилмақта.

Америка авази тор бетидә, қурултай тәйярлиқ гурупписиға җяңсу партком секретари ли юәнчяв билән шәнши өлкә башлиқи йү юҗүнләрниң сәпләнгәнлики һәмдә кадирларни орунлаштуруш вә сиясий доклат тәйярлаш органлирида ишләшкә башлиғанлиқи алаһидә хәвәр қилинди.

Мулаһизичиләр, һәр бәш йилда бир қетим чақирилидиған компартийә қурултайлирида йеңи сәплинидиған рәһбәрләр һәққидики һикайиләрниң тарқилиши хитай җәмийитидә адәткә айланғанлиқини тәкитләш билән бир вақитта, юқиридики икки кишиниң мәркизий органдики сиясий бюроға кириши мумкинликини пәрәз қилишмақта.

Мулаһизичиләрниң тәһлилигә асасланғанда, 50 ‏- йиллардин кейин туғулған, мәдәнийәт инқилабидин кейинки дәсләпки түркүм алий мәктәпләрни пүттүргән шуниңдәк сиясий өлчәмләр биләнла әмәс кәспий тиришчанлиқлири билән оттуриға чиққан бу йеңи бир әвлад кишиләр чоң боран ‏- чапқунлуқ ислаһатларни қилалмисиму, әмма йәнила сиясий сәһнидә һәрикәт қилалайдикән.

Хоңкоңлуқ хитай обзорчи хе ляңляң бу мунасивәт билән "йеңи бир әвлад рәһбәрлик гурупписиниң мәйданға килиши нәтиҗисидә, хитай компартийисиниң 18 ‏- һәтта 19 ‏- қурултайлиридин кейин хитайниң сиясий ислаһатидин үмид күткили болиду" ғанлиқини оттуриға қойди. (Меһрибан)