Xitaydiki insanperwer zatlar xitaygha qaritilghan imbargoni bikar qilish shertlirini otturigha qoydi

Xitayning memliket ichi we sirtidiki kishilik hoquqni himaye qilidighan insanperwer zatlar, yawropa ittipaqi rehberlirige ochuq xet élan qilip, xitaygha qaritilghan qoral - yaraq imbargosini bikar qilishning üch aldinqi shertini otturigha qoydi.

" Tyen enmindiki anilar herikiti" ning 125 neper ezasi bilen, 4 - iyun herikitining rehberliri shundaqla 400 din artuq xitay démokratiye herikitining serkerdiliri, charshenbe küni yawropa ittipaqining rehberlirige yazghan ochuq xetke imza qoyghan. Ochuq xet élan qilish herikitini " puqralar hoquqini qoghdighuchi pida'iylar" shundaqla " jaw ziyangni depne qilish komitéti" qatarliq teshkilatlar uyushturdi. Ular ochuq xette yawropa ittipaqining rehberlirini agahlandurup, " 1989 - yildiki tyen enmin weqesi jonggoluqlar üchün kona dewrning shanliq kalindari bolup qalghini yoq, jonggoning kishilik hoquq weziyitide 1989 - yildin béri héchqandaq yaxshilinish bolup baqmidi," dep tekitligen.

Ular, yawropa ittipaqining xitay hökümiti töwendiki üch xil shertni hazirlighan ehwal astida andin imbargoni bikar qilishni telep qilghan. Bu üch xil shert " widan mehbuslirini qoyup bérish yaki ashkare sot qilish" , " 4 - iyun weqesini tekshürüsh we jawapkarlarni sürüshtürüsh" , " xelq'ara puqralar hoquqi we siyasi hoquq ehdinamisini imzalash we uninggha emel qilish" qatarliqlarni öz ichige alidiken. Yawropa ittipaqi 1989 - yildiki tyen enmin weqesidin kéyin xitaygha qoral - yaraq imbargosi yürgüzgen. Yawropa ittipaqi yéqinda imbargoni bikar qilishni oylishiwatqanliqini élan qilghan idi. (Erkin)