Хитай "инақ җәмийәт" бәрпа қилаламду ?

Хитайда бай - кәмбәғәллик пәрқиниң җиддий кеңийиши хитай даирилириниң 11 - бәш йиллиқ пилан җәрянида әмәлгә ашурмақчи болған " инақ җәмийәт бәрпа қилиш" пиланиға җиддий тәһдит салмақта.

Шинҗаң радио истансиси бу һәқтики бир хәвиридә, хитайниң кирим пәрқи дунядики кирим пәрқи дәриҗиси оттураһал дөләтләрдин ешип кәткәнлики вә бу әһвалниң " җуңго һөкүмити 11 - бәш йиллиқ пиланда оттуриға қойған иҗтимаий, иқтисади тәрәққият истиратегийиси вә инақ җәмийәт бәрпа қилиш билән мас кәлмәйдиғанлиқини" илгири сүрди.

Шинҗаң радио истансисиниң әскәртишичә, кирим пәрқиниң кеңийип кетишигә "ислаһат, ечиветиш вә базар игилики сияситини зор күч билән тәрәққи қилдуруш " вә шуниң билән биргә " пулдарлар" ниң мәбләғ селиш, байлиқ яритиш қизғинлиқи сәвәбчи болмақта. Хитай әмгәк вә иҗтимаий капаләт министирлиқи елан қилған бу һәқтики бир доклатида, бай- кәмбәғәллик пәрқиниң нормал чәктин һалқип кәткәнликини агаһландурған иди.

Шинҗаң радио истансисиниң илгири сүрүшичә, хитай һөкүмити бу мәсилини һәл қилидиған бәзи чарә - тәдибләр үстидә издәнмәктә вә мутәхәссисләр оттура тәбиқә синипини күчәйтиш зөрүрликини оттуриға қоймақта икән. Лекин бәзи анализчилар , оттура тәбиқә синипини күчәйтиш нәтиҗисидә хитайда демократийә тәлипиниң тосивалғили болмайдиған бир еқимға айлинидиғанлиқини билдүрмәктә. (Әркин)