Хитай америкиниң тибәт һәққидики доклатиға қарши чиқти


2005.04.24

Хитай һөкүмити йәкшәнбә күни баянат елан қилип, америка ташқи ишлар министирлиқиниң тибәт мәсилилири һәққидә мәхсус доклат елан қилишини, хитайниң ички ишлириға арилашқанлиқ дәп әйиблиди.

Америка ташқи ишлар министирлиқи 12 - април күни дөләт мәҗлисигә " тибәт мәсилилири сөһбитиниң йиллиқ доклати" ни сунған иди. Доклатта, президент буш вә башқа һөкүмәтниң юқири дәриҗилик әмәлдарлириниң өткәнки бир йилдин буян хитай рәһбәрлирини далай лама вә униң вәкиллири билән сөһбәт өткүзүшкә чақирип келиватқанлиқи көрситилгән.

Америка тәрәп доклатта йәнә, тибәтниң диний даһиси далай ламани " хитай үчүн раюнлуқ вә дөләт ичидики муқимсизлиқ мәсилисини һәл қилишта пайдиси бар бир һәмраһ" дәп тәсвирлигән. Доклатта шундақла, " әгәр хитай далай лама билән һәмкарлашмай, тибәт дүч келиватқан мәсилиләрни һәл қилалмиса, бу, хитайниң америка вә башқа дөләтләр билән сиясий вә иқтисадий җәһәттин омумйүзлүк һәмкарлиқ орнутушиға тосалғу болиду" дийилгән.

Бу америка ташқи ишлар министирлиқиниң тибәт һәққидә елан қилған үчинчи йиллиқ доклати болуп һесаблиниду. Мәзкур доклат чәтәлдики тибәтләрниң қизғин алқишиға еришкән.

Әмма, хитай ташқи ишлар министирлиқиниң баянатчиси чин йәкшәнбә күнидики баянатида, америкиниң бу доклатини " сөзлири мәсулийәтсизлик билән қилинған" һәмдә " һәқиқәттин чәтнигән" дәп әйиблигән. У йәнә америка һөкүмитидин тибәтниң " мустәқиллиқини қоллимаслиқни" вә тибәт мәсилисидин пайдилинип, хитайниң ички ишлириға арилашмаслиқни тәләп қилған. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.