Xitay, amérikining kishilik hoquq jehettiki eyiblishige reddiye berdi

Xitay hökümiti yekshenbe küni amérikining kishilik hoquq jehettiki eyiblishige reddiye berdi hemde uzun yilliq aditi boyiche amérikini ikki xil ölchem qoydi dep tekrar eyiblidi.

Amérika tashqi ishlar ministirliqi 10‏-dékabir shenbe "xelq'ara kishilik hoquq küni" munasiwiti bilen dunyadiki kishilik hoquq depsendichiliklirini körsitip ötti. Doklatta, " kubadin xitayghiche, bélarustin bérmighiche, özbékistandin zimbabuwigiche we irandin shimaliy koriyigiche bolghan jaylarda yüreklik kishilik hoquq pa'aliyetchiliri dawamliq depsende qiliniwatidu we türmige soliniwatidu" dep yézilghan.

Xitay tashqi ishlar ministirliqining bayanatchisi chin gang, "xitay hökümiti we puqraliri amérikining bu eyibleshlirige küchlük qarshiliq körsitidu" dep bildürdi. U sözide yene, "amérika hökümiti özide éghir kishilik hoquq depsendichilikliri bar" dep eyiblep, amérikining, b d t kishilik hoquq komitétining tekshürüshini ret qilghanliqini misal qildi.

B d t kishilik hoquq komissari lu'is arbur ötken charshenbe küni amérika bashlighan térrorchiliqqa qarshi urushning, amérikining dunya kishilik hoquq weziyitidiki yétekchi rolini ajizlitiwatqanliqini bildürdi. Amérika tashqi ishlar ministiri kondoliza rays amérikining tutqunlarni tutup turush herikitini aqlap, buni "térrorchilarning hujumidin saqlinish üchün élip bérilghan qanunluq heriket" dep körsetti. (Peride)