Béyjing, xitay kishilik hoquq xatirisini aqlap, amérikining eyiblishini ret qildi

Amérika döletlik axbarat idarisining bashliqi jon nigriponté ötken hepte washin'gtonda xitay hökümitini béyjing da'iriliri öktichilerni basturmaqta, dep eyibligendin kéyin, xitay hökümiti düshenbe küni bayanat élan qilip, xitay kishilik hoquq xatirisini aqlidi we xitay puqralirining turmush shara'iti yaxshilanmaqta, dep körsetti.

Xitay tashqiy ishlar ministirliqi bu heqtiki bayanatida, " junggo hökümiti asasiy qanundiki kishilik hoquqqa hörmet qilish we uni qoghdash prinsipini jiddiy emeliyleshtürmekte " , " junggo hökümiti pütün xelqning iqtisadi, ijtima'iy we medeniyet hoquqini yuqiri kötürüsh yolida pidakarliq körsetti " deydu. Jon nigriponti ötken hepte amérika dölet mejliside guwaliqtin ötüp, öktichilerni basturush xitayda muqumsizliqni keltürüp chiqarmaqta we bu ularning tashqiy siyasitige tesir körsetmekte, dep tekitligen. Uning eskertishiche, junggo duch kéliwatqan eng chong riqabet iqtisadi tereqqiyatning üzliksizlikini saqlash, puqralargha xizmet tépip bérish we yéza - kentlerning naraziliqini peseytish bolup, u " xitay buning üchün iqtisad, edliye, ma'arip, muhit séstimisi we xiyanetchilik qatarliq bir qatar mesililerni hel qilish kérek " deydu.

Xitayning yéqinqi yillardiki herbiy tereqqiyati, siyasiy we diniy erkinlikke cheklime qoyush, xitay - amérika sodisidiki passip balanis qatarliq amillar amérikini endishige saqlmaqta idi. Amérika dölet mudapi'e ministirliqi yekshenbe küni élan qilghan doklatida xitayni amérikining kélechektiki " yoshurun reqibi " dep atighan.

Birleshme axbarat agéntliqining tekitlishiche, xitay dölet re'isi xu jingtawning bu yil 4 - ayda washin'gtonda élip baridighan ziyariti béyjing da'iriliri teripidin xitay - amérika istiratégiyilik shériklik munaswitini turghuzush üchün purset, dep qaralmaqta iken. (Erkin)