Xitay éntérnét tor betlirige qaratqan nazaritini téximu kücheytmekte

Merkizi fransiyidiki xelqara chégrisiz muxbirlar teshkilati, 8 ‏- iyun küni xitay hökümitining éntérnét tor betliri üstidin élip bériwatqan nazaritining chékidin ashqanliqini qattiq eyiblidi.

Chégrisiz muxbirlar teshkilatining asiya bölümi mes'uli Vincent Brossel , xitay hökümitining bolupmu , tyen'enmin weqesi yüz bergenlikining 17 yilliqi munasiwiti bilen , gogol tor bétide élan qilin'ghan eyni waqittiki körünüshler we bu heqtiki maqalilerning pütünley élip tashlan'ghanliqidin intayin narazi bolghanliqini bildürdi.

Mezkür teshkilatning bildürüshiche, gogol tor béti xitay hökümitining bésimigha taqabil turalmighan.

Dunya Uyghur qurultiyining bayanatchisi dilshat rishitning bildürüshiche, xitay da'iriliri, yalghuz xitay üchün échilghan tor betlirige qaritilghan kontrolluqini kücheytipla qalmastin, belki Uyghurlar üchün échilghan tor betlirinimu qattiq nazaret qilip kelmekte iken.

Bolupmu éntérnét saqchiliridin bizar bolghan éntérnét mushtiriliri, özlirige a'it bolghan shexsi qarashliri heqqidimu pikir yürgüzelmeydiken. Ikranda kishilik hoquq, démokratiye dégen'ge oxshash atalghular chiqishi bilen éntérnét saqchiliri derhal heriketke kélip, tor mushtirilirigha agahlandurush béridiken.

Uning eskertishiche , Uyghurlar yene, erkin asiya radi'osi shuningdek chet'ellerde pa'aliyet élip bériwatqan Uyghur teshkilatliri tüzgen tor betlirini körelmeyla qalmastin ,, eger bu meydan'gha kirgüchiler pash bolup qalsa derhal saqchilar teripidin qolgha élinidiken. (Eqide)