Xitay da'iriliri "xitay esiri" tor bétini taqidi


2006.07.26
Share on WhatsApp
Share on WhatsApp

Xitay da'iriliri yéqinda erkin maqalilerni élan qilish bilen xitayda közge körün'gen "xitay esiri" namliq munazire tor bétini taqiwetken.

"Xitay esiri" tor béti 2000‏- yili béyjing bilen xitaydiki medeniyet tetqiqat orunliri teripidin qurulghan bolup, uningda jem'iyet, iqtisat, medeniyet we pen-téxnikigha a'it témilardin sirt yene, xelq'ara weziyetni asas qilghan témilar munazire qilinidiken. Shundaqla xitaydiki nurghun ziyaliylar bu tor bétide öz maqalilirini élan qilidiken.

Emma 25‏-iyol küni bu tor bétide "munasiwetlik organlarning uqturushi bilen bu tor béti taqiwétildi" dégen élan chiqqan. Bu tor bétide keng da'iridiki témilardin bashqa yene, nurghun erkin pikirler otturigha qoyulghachqa, torgha chiqquchilarning qizghin alqishigha érishken hemde uninggha tizimlatqan kishilerning sani 30 mingdin ashqan idi.

Xongkongda chiqidighan "jenubiy xitay etigenlik géziti" ning mezkur tor bet mes'ulining sözini neqil keltürüshiche, béyjing sheherlik alaqe bashqurush idarisi düshenbe küni ulargha uchur tarqitish ruxset kénishkisini béjirmigen dep bu betni taqash buyruqini chüshürgen. Xitay da'irilirining intérnétke bolghan kontrolluqi nöwette axbarat erkinlikini qoghdaydighan orunlar hemde kishilik hoquq teshkilatliri eyiblep kéliwatqan asasliq mesililerning biri bolup qaldi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.