Xitay da'iriliri tibetlik ayal yazghuchining tor bétini pichetlidi


2006.07.31

Xitay hökümiti tibetlik ayal yazghuchi sérin osérning " tibet medeniyiti" we " dachi" dep atilidighan ikki tor bétini tibet rohani dahisi dalay lamaning tughulghan künini xatiriligenliki we tibet weziyitige da'ir nazuk mesililer üstide pikir yürgüzgenliki üchün taqiwetti.

Bu ikki tor béti tibet yashliri eng köp kiridighan tor betlerdin bolup qalghan we tibettiki eydiz késilidin tartip, tibet tömür yoli we medeniyet inqilabi dewridiki tibet weziyitigiche bolghan bir qatar mesililer üstidimu munazire élip barghan. Bu mesililer xitay kompartiye hökümiti 1951 - yili tibetni " azat " qilghanliqini jakarlighandin béri munazire qilinsa béyjing hökümiti bi'aram bolidighan mesililer idi.

" Tibet mediniyet tori" ning bashqurghuchisi wangshyu seyden, " biz 28 - iyul küni ölkilik hökümet da'iriliridin tor bétimizning taqalghanliqi toghrisida uqturush tapshuruwalduq" deydu. Lékin u tor bétining taqilish sewebini bilmeydiken. Emma tor bétini taqash buyruqi merkizi teshwiqat bölümi teripidin chiqirilghan bolushi mumkin. Osér her ikkila tor bétining taqalghanliqini tenqid qildi. U, buni kishini epsuslanduridighan weqe, dep tekitligen.

Sérin osér, " junggoda kishilerning bu xil muhit astida toghra köz qarishi we awazini otturigha qoyalishi tes"deydu. Uning eskertishiche, u dalay lamaning tughulghan künini tebrikleydighan bir parche shé'ir yézip uni 6 - iyul küni " medeniyet tori" da élan qilghan. Xitay da'iriliri 2003 - yili osérning tibet heqqidiki nazuk mesililerni mezmun qilghan " tibet xatiriliri" namliq esirini chekligen idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.