Xitay intérnét alaqisige bolghan közitish, tekshürüsh we teqib qilish téxnikisini téximu kéngeytmekchi

Yéngidin meydan'gha kelgen intérnét téxnikisi xitayning tor alaqisige bolghan közitish, tekshürüp turush we teqib qilish ishlirigha qiyinchiliq tughdurdi. Shuning bilen xitayda, mushu téxnikidin paydilinip yoshurun halda intérnét yéziqchiliqi we tor axbaratchiliqi bilen shughullinip xitay hökümitige we siyasitige öz naraziliqlirini ipadileydighan xahishlar künsayin ashqan idi.

Fransiye agéntliqining 13 ‏-mart béyjingdin bergen xewirige qarighanda, intérnét yéziqchiliqi we tor axbaratchiliqigha bolghan kontrolluqini kücheytish üchün, xitay yene intérnét alaqisige bolghan teqib qilish téxnikisini téximu kéngeytmekchi.

Xitay neshriyat we axbarat bashqurush idarisining bashliqi lung shinmin mundaq deydu, " ilghar intérnét yéziqchiliqi we tor axbaratchiliqi téxnikisi, hökümetning éntirnétni közitip turush ishlirigha qiyinchiliq tughdurmaqta ".

Bu yil yanwarda xitay prézidénti xu jintaw " intérnétni tazilash" qa chaqirghan. Lungning bildürüshiche, xitay hökümiti" téximu saghlam we aktip intérnét muhiti hazirlash" üchün, yingi bir intérnét tüzümini otturigha qoyushqa teyyarliq qiliwatqan iken. Mutexessisilerning éytishiche, xitayda éntérnétke bolghan teqib we közitish ishlirini yürgüzidighan 30 mingdin 40 mingghiche "intérnét saqchisi" bar iken.

Axbarat wasitiliri közetchisi "chégrisiz muxbirlar teshkilati" xitay hökümitini " intérnét düshmini" dep ataydu. Ötken yili xitayda 52 adem hökümet terep "namuwapiq" dep qarighan pikirlerni torda bayan qilghanliqi üchün türmige tashlan'ghan. (Jüme)