Хитайда тор понкитлирини тизимға алдуруш тәләп қилинди

Хитайдики алақидар даириләр, мәмликәт ичидики тор понкитлирини чоқум тизимға алдуруш тоғрисида һөҗҗәт тарқитип, тизимға алдурмиған тор понкитлирини тақайдиғанлиқи яки еғир җәриманә қоюдиғанлиқини агаһландурди.

Хитай учур игилики министирлиқиниң һөҗҗити бойичә, тизимға алдурмиған тор понкитлириға көп болғанда бир милйон йүән җәриманә қоюлидикән. Мәзкур органниң тор бетидики хәвәрдә көрситилишичә, хусусийлар башқурушидики яки тиҗарәт характиригә игә болмиған тор понкитлириниң мәсуллири кимликини тизимға алдуруш керәк. Тизимға алдурушниң ахирқи чекини 6 - айниң 30 - күни, дәп бекиткән. Һазирға қәдәр хитайда мәмликәт ичидики 74 ٪ тор понкити тизимға елинған.

Бирләшмә ахбарат агентлиқи хитайда интернет қоллинидиған кишиләрниң сани 87 милйонға йетидиғанлиқини билдүрди. Көзәткүчиләр, мәзкур бәлгилимә хитай һөкүмитиниң еғир бесими астидики уйғурчә тор понкитлириниң әһвалини техиму қийинлаштуруветиши мумкин, дәп көрсәтмәктә.

Мәркизи париздики "чегрисиз мухбирлар тәшкилати" тор понкитлирини тизимға елиш бәлгилимиси, тор понкити қурғучиларни қорқутушни мәқсәт қилғанлиқини әйиблигән. Мәзкур орган хитай даирилириниң тор понкитлирини көзүтүш вә байқаш техникисиниң илғарлиқи кишини әндишигә салиду, дәп көрсәткән. (Әркин)