Xitayda xizmet intizamigha xilap jinayetler kündin - kün'ge köpeymekte

Yéqinda xitay merkizi teshkilat ministirliqi, xizmet intizamigha xilap jinayetler üstide tekshürüsh élip bérip, 121 diloni pash qilip, mes'ulyiti éghir 192 kishini jazalash bilen birge dilogha chétishliq 613 ademni tartip chiqqan.

Shinxu'a agéntliqining bu heqte bergen xewirige asaslan'ghanda, 2006 ‏-yili 8 ‏- ayda gu'angdung ölkisi yingdé shehiri bolo bazarliq hökümitide mulazimetchilik qilidighan li shiyang, partkom hey'et ezasi bolup saylinish üchün 100 ming yüen pul xejlep, bazarliq hökümetning partkom sékritari li shénjing bashliq 6 kishini özi üchün bélet tashlashqa sétiwalghan. Gerche li shiyangning meqsidi emelge ashqan bolsimu, emma uzun ötmey mezkür dilo pash qilin'ghan.

Bu arida Uyghur aptunum rayonluq intizam tekshürüsh kométiti, partiye ichide nechche on minglighan kishining agahlandurush we jazalashqa uchrighanliqini pash qilip, ötken bir yil ichide 10 ming qétimdin artuq jinayet pash qilish inkaslirini tapshuruwalghanliqini, buning ichide mingdin artuq diloning pash qilinip, 1209 ademning partiye ichide jazalan'ghanliqini shuningdek eslige keltürülgen iqtisadiy ziyanning 100 milyon yüendin éship ketkenlikini bildürdi.

Nöwette közetküchiler, xitay merkizi hökümitidin tartip yerlik hökümetkiche köpiyiwatqan xizmet intizamigha xilap jinayetler, kompartiyini haleket girdawigha bashlaydighan tüp amil diyishmekte. (Eqide)