Xitayning merkezdiki organlirining hemmiside iqtisadiy mesile körüldi

Xitay mupettish mehkimisi peyshenbe küni doklat élan qilip, xitayning eng aliy hoquqini igiligen ,merkezdiki organlarning hemmiside maliye mesilisi körülgenlikini bildürdi.

Mupettish mehkimisining merkezdiki ministir derijilik 32 organning 2004 - yilliq xamchotini tekshürüsh doklatining netijisige qarighanda, bu orunlar shirket qurush, hökümet pulini yötkep ishlitish, yer- zémin sodilirigha meblegh sélish, qatarliqlar qanunsiz pa'aliyetler bilen shughullan'ghan. Ularda körülgen maliye mesilisi on nechche milyard yü'en'ge chétilidu.

Doklatta körsitilishiche, xitay xelq awi'atsiye bash shirkiti öz aldigha 87 milyon yü'endin artuq pulni ayrim suqiwalghan. Döletlik maddiy eshyalarni zapas saqlash idarisi bir milyard 400 milyon yü'enlik qerz bérip, hazirghiche qerzini alalmighan. Sehiye ministirliqi tibbi eslihelerni bahalashqa ajritilghan 2 milyon yü'en'ge yéqin pulni qimmet bahaliq mashina sétiwélishqa ishlitiwetken. Qalghan tarmaqlarmu mushuninggha oxshash pullarni yötkep ishlitish, pay- chek sétiwélish we yer- zimin sodisi qilishtek qanunsiz pa'aliyetlerni élip bérip, ammining nechche on milyon yü'en puligha ziyan salghan.

Alaqidar mutexesssilerning bildürüshiche, xitayning aliy hoquq tutqan organlirida, maliye mesilisining bundaq éghir bolushi, xitayning xamchot tüzülmisining ilmiy, ochuq- yoruq emesliki we öz- özini nazaret qilish séstimisining kemchillikini körsitidiken.

Xitay mupettish mehkimisi bu doklatni élan qilghan waqti del, béyjingda xelq'ara chériklikke qarshi yighin ötküzüliwatqan bir peytke toghra keldi. Bu yighinda, iqtisadiy tereqqiyat we hemkarliq teshkilati, xitayda intayin éghir boluwatqan chiriklik mesilisining xitay kompartiye rehberlirining qanuniy ornigha qattiq tehdit élip kéliwatqanliqini bildürgen idi.(Arzu)