Тәйвән, дөләт игиликидики ширкәтләрниң исимлиридики хитай сөзини елип ташлашни қарар қилди


2004.12.06

Тәйвән президенти чен шүйбйән, тәйвәндики дөләт игиликидики ширкәтләрниң хитай ширкәтлири билән алмишип кетишиниң алдини елиш үчүн, ширкәт исимлиридики хитай дигән сөзни чиқиривитидиғанлиқини җакарлиди.

Тәйвән президенти чен шүйбйән йәкшәнбә күни тәйбейда мухбирларға бәргән баянатида, тәйвәндики ширкәтләргә исимлиридики хитай дигән сөзни еливитиши үчүн икки йил вақит берилидиғанлиқини билдүрди.

Америка бирләшмә агентлиқиниң хәвәр қилишичә, тәйвәнниң бу һәрикити хитай һөкүмити тәрипидин тәйвәнниң мустәқиллиқ йолида ташлиған йәнә бир қәдими дәп тәбир қилиниши мумкин.

Хәвәрдә ейтилишичә, тәйвәндики дөләт игиликидики ширкәтләрниң исми гоминдаң партийисиниң һакимийити дәвридә қоюлған. Хитайдики һакимийитини қайтидин әслигә кәлтүрүшни өзигә нишан қилған гоминдаң партийиси тәйвән күчлүк бир хитай кимликини тәшвиқ қилған.

Лекин тәйвәндә әзалириниң көпчилики тәйвәнниң йәрлик хәлқидин тәшкил тапқан, чен шүйбйәнниң илғарлиқ вә тәрәққият партийиси һакимийәт бишиға кәлгәндин бири, йеңи бир тәйвәнлик кимликини илгири сүрмәктә. Президент чен шүйбйән тәйвәндики бурунқи хитай рәсми символлирини аста-аста бикар қилип, уларниң орниға йеңи тәйвәнниң миллий кимликини гәвдиләндүридиған символларни қобул қилмақта.

Хитай рәһбәрлири һәмдә тәйвәндики хитай билән бирлишишни яқилайдиған хитайлар, чен шүйбйәнни хитайни тәйвәндин пүтүнләй айриш йолиға елип кетип бариду дәп әйиблимәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.