Teywen, dölet igilikidiki shirketlerning isimliridiki xitay sözini élip tashlashni qarar qildi

Teywen prézidénti chén shüybyen, teywendiki dölet igilikidiki shirketlerning xitay shirketliri bilen almiship kétishining aldini élish üchün, shirket isimliridiki xitay digen sözni chiqiriwitidighanliqini jakarlidi.

Teywen prézidénti chén shüybyen yekshenbe küni teybéyda muxbirlargha bergen bayanatida, teywendiki shirketlerge isimliridiki xitay digen sözni éliwitishi üchün ikki yil waqit bérilidighanliqini bildürdi.

Amérika birleshme agéntliqining xewer qilishiche, teywenning bu herikiti xitay hökümiti teripidin teywenning musteqilliq yolida tashlighan yene bir qedimi dep tebir qilinishi mumkin.

Xewerde éytilishiche, teywendiki dölet igilikidiki shirketlerning ismi gomindang partiyisining hakimiyiti dewride qoyulghan. Xitaydiki hakimiyitini qaytidin eslige keltürüshni özige nishan qilghan gomindang partiyisi teywen küchlük bir xitay kimlikini teshwiq qilghan.

Lékin teywende ezalirining köpchiliki teywenning yerlik xelqidin teshkil tapqan, chén shüybyenning ilgharliq we tereqqiyat partiyisi hakimiyet bishigha kelgendin biri, yéngi bir teywenlik kimlikini ilgiri sürmekte. Prézidént chén shüybyen teywendiki burunqi xitay resmi simwollirini asta-asta bikar qilip, ularning ornigha yéngi teywenning milliy kimlikini gewdilendüridighan simwollarni qobul qilmaqta.

Xitay rehberliri hemde teywendiki xitay bilen birlishishni yaqilaydighan xitaylar, chén shüybyenni xitayni teywendin pütünley ayrish yoligha élip kétip baridu dep eyiblimekte. (Qanat)