Җилин өлкисиниң башлиқи вәзиписидин истипа бәрди


2004.10.31

Хитайниң шәрқий шималидики җилин өлкисиниң башлиқи хоң ху өлкә рәислик вәзиписидин истипа бәрди. Хитай һөкүмити хоңхуниң орниға ваң миңни муваққәт өлкә рәиси қилип тәйинлигән.

Америка бирләшмә ахбарат агентлиқи, хитай мәтбуатлириниң хоңхуниң вәзиписидин айрилғандин кейинки тәқдири тоғрисида һичқандақ хәвәр бәрмигәнликини тилға алди. Хәвәрләргә қариғанда хоңхуниң вәзиписидин истипа бериши униң өлкә рәиси мәзгилидики җилин шәһиридә йүз бәргән от апити билән мунасивәтлик икән.

Бу йил 2 - айниң 15 - күни җилин шәһиридики бир сода сарийида от апити йүз берип, 53 адәм өлгән иди. Хоңху вәқә мунасивити билән 2 - айниң 19 - күни очуқ хәт елан қилип, җилин хәлқидин кәчүрүм сориған. 4 - Айниң 18 - күни җилин шәһәр башлиқи вәзиписидин истипа бәргән.

Хизмәттики мәсулийәтсизликтин истипа бериш хитай компартийисиниң сиясий мәдинийәт әнәниси бойичә аз учрайдиған әһвал дәп қаралмақта. 1990 - Йилларда уйғур аптоном райониниң қарамай шәһиридики бир кулубқа от кетип, кулуб ичидики мутләқ көп қисим өсмүрләрни асас қилған 300 дин артуқ киши көйүп өлгән. Әйни чағда кулуб ичидикиләр хитай тарихидики 9 - декабир оқуғучилар һәрикитини хатириләш мунасивити билән сәнәт паалийити өткүзивататти. Хитай һөкүмити вәқәдин кейин кулуб башқурғучиларниң бәзилирини қолға алған. Бирақ қарамай шәһири, шинҗаң нефит башқуруш идариси, уйғур аптоном районидики һичқандақ бир рәһбири кадир хәлқ аммисидин кәчүрүм соримиған, вәзиписидин истипа бәрмигән вә яки уларниң җавапкарлиқи сүрүштүрүлмигән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.