Xitay da'iriliri dungju kentige saqchi qisimlirini yötkep kélip puqralarni agahlandurdi

2007-12-26
Élxet
Pikir
Share
Print

Xitay da'iriliri gu'angdungning shyenwéy shehiri dungju kentige saqchi qisimlarni yötkep kélip, puqralarni mezkur kenttiki tirikchilik qilidighan yer ‏- zémin'gha éléktir istansisi sélish qurulushigha qarshi yene isyan kötermeslikke agahlandurdi.

Birleshme axbarat agéntliqining eskertishiche, da'iriler charshenbe küni seherde kanayliq teshwiqat mashinilirini dungju kentige ewetip, puqralarni namayish qilmasliqqa agahlandurghandin sirt, qoralliq saqchilar éléktir istansisigha baridighan pütün yollarni qamal qilghan shundaqla dungju kenti etrapida puqrache kiyin'gen saqchilar köpiyip ketken.

Birleshme axbarat agéntliqi bir neper muxbirning dungjuda puqrache kiyin'gen saqchilar teripidin saqchi ponkitige élip bérilghanliqini we bir sa'et soraq qilin'ghandin kéyin, saqchi mashinisida shyenwéy shehirige élip bérilip dungjugha 2 - barmasliqqa agahlandurulghanliqini bildürdi. Xitay hökümiti buningdin bir yil burun béyjing olimpik musabiqisi munasiwiti bilen belgilime chiqirip, chet'ellik muxbirlarning her qaysi ölke - aptonom rayonlarni xalighanche ziyaret qilishigha yol qoyghan bolsimu, lékin chet'ellik muxbirlar we axbarat erkinlikini qoghdighuchi teshkilatlar xitay da'irilirini bu wediside turmidi, dep eyiblimekte idi.

Shyenwéy sheherlik partkomning bayanatchisi lyu jinmaw, yerlik hökümetning dungjuni bixeterlik rayoni, dep élan qilghanliqini eskertip, yéngi axbarat belgilimisi bu rayonda ötmeydighanliqini bildürgen. Yerlik puqralar radi'omizgha dungjuda birer mingdek saqchi közetküchilik qiliwatqanliqini ilgiri sürmekte.

Ötken hepte éléktir istansisi qurulushigha qarshi chiqqan yerlik puqralar bilen saqchilar arisida toqunush yüz bérip, saqchilar namayishchilargha yash aqquzush bombisi atqan. (Erkin)

Pikirler (0)
Share
Toluq bet