Хитайниң юқири дәриҗилик бир әмәлдари тәйвәнгә җасуслуқ қилиш сәвәбидин өлтүрүлди
2006.08.08
Җоңго мәмликәтлик иҗтимаий саламәтлик фонди җәмийитиниң юқири дәриҗилик бир әмәлдари тәйвәнгә җасуслуқ қилиш сәвәбидин өлүм җазасиға һөкүм қилинип иҗра қилинған.
Хитай даирилири мәзкур җасуслуқ дилоси тоғрисида мәхсус синалғу филими ишлиди вә мәмликәтниң һәр қайси җайлирида партийә вә һөкүмәт хадимлириға көрситип, уларни дөләт мәхпийәтликини сақлаш тоғрисида агаһландурди.
Бирләшмә ахбарат агентлиқиниң хәвәр қилишичә, җоңго иҗтимаий саламәтлик фонди җәмийити баянатчиси ян сәйпиң, мәзкур органниң ишхана мудири тоң даниң тәйвәнгә җасуслуқ қилиш сәвәбидин әйиблинип өлүм җазасиға һөкүм қилинғандин кейин, бу йил 21 - април күни иҗра қилинғанлиқини билдүргән. ян сәйпиң, тоң дапиңниң тәйвәнгә җасуслуқ қилғанлиқини тәкитлигән болсиму, лекин у бу дилониң тәпсили әһвалини ашкарилимиди.
Җоңго билән тәйвән 1949 - йили өз ара айрилип кәткәндин буян, тәйвән хитайниң һәрбий вә дипломатик бесимиға учрап кәлмәктә вә бири бириниң үстидин җасуслуқ паалийәтлирини қанат яйдурмақта.
Тәйвән дөләт мудапиә министирлики баянатчиси ваң рүйлоң, тоң даниңниң җасуслуқ вәқәсигә баһа беришни халимиди. У, тоң даниңниң тәйвәнгә җасуслуқ қилған - қилмиғанлиқини баһалаш тоғра болмайду, дәйду.
Йеқинқи йилларда хитайниң юқири дәриҗилик һәрбий әмәлдарлиридин тәйвәнгә җасуслуқ қилип қолға елинғанлар хели бар. Бу җоңго һава армийә командирлар мәктипиниң мудири вә муавин мудирлирини өз ичигә алған бир қатар генералларни өз ичигә алиду. (Әркин)
Мунасивәтлик мақалилар
- Әншүн гезитиниң мухбири сақчилар тәрипидин уруп өлтүрүлди
- Хитай өлүм җазаси берилгән делоларға очуқ сот ечишни қарар қилди
- Хенәндики бир йәслидә қәстән от қоюш вәқәси йүз берип 3 бала өлди
- Алий сот мәһкимиси: җуңго төвән сәвийилик мәдәниләшкән җәмийәт
- Лю ренвен: хитайда йилиға оттура һисаб билән 8 миң адәм өлүм җазасиға һөкүм қилиниду