Xitayning yuqiri derijilik bir emeldari teywen'ge jasusluq qilish sewebidin öltürüldi

Jonggo memliketlik ijtima'iy salametlik fondi jem'iyitining yuqiri derijilik bir emeldari teywen'ge jasusluq qilish sewebidin ölüm jazasigha höküm qilinip ijra qilin'ghan.

Xitay da'iriliri mezkur jasusluq dilosi toghrisida mexsus sin'alghu filimi ishlidi we memliketning her qaysi jaylirida partiye we hökümet xadimlirigha körsitip, ularni dölet mexpiyetlikini saqlash toghrisida agahlandurdi.

Birleshme axbarat agéntliqining xewer qilishiche, jonggo ijtima'iy salametlik fondi jem'iyiti bayanatchisi yan seyping, mezkur organning ishxana mudiri tong daning teywen'ge jasusluq qilish sewebidin eyiblinip ölüm jazasigha höküm qilin'ghandin kéyin, bu yil 21 - april küni ijra qilin'ghanliqini bildürgen. Yan seyping, tong dapingning teywen'ge jasusluq qilghanliqini tekitligen bolsimu, lékin u bu diloning tepsili ehwalini ashkarilimidi.

Jonggo bilen teywen 1949 - yili öz ara ayrilip ketkendin buyan, teywen xitayning herbiy we diplomatik bésimigha uchrap kelmekte we biri birining üstidin jasusluq pa'aliyetlirini qanat yaydurmaqta.

Teywen dölet mudapi'e ministirliki bayanatchisi wang rüylong, tong daningning jasusluq weqesige baha bérishni xalimidi. U, tong daningning teywen'ge jasusluq qilghan - qilmighanliqini bahalash toghra bolmaydu, deydu.

Yéqinqi yillarda xitayning yuqiri derijilik herbiy emeldarliridin teywen'ge jasusluq qilip qolgha élin'ghanlar xéli bar. Bu jonggo hawa armiye komandirlar mektipining mudiri we mu'awin mudirlirini öz ichige alghan bir qatar générallarni öz ichige alidu. (Erkin)