Хитай һөкүмити намайишчиларни қамақ җазасиға һөкүм қилди

Ләнши шәһәрлик соти, өткән йили җеҗяң өлкиси дуңяң шәһиридә елип берилған наразилиқ һәрикитини тәшкиллигән дәп әйибләнгән үч кишини бир йилдин 5 йилғичә қамақ җазасиға һөкүм қилди.

Өткән йили априлда, җеҗяң өлкисиниң дуңяң шәһиридә миңлиған намайишчи билән хитай сақчилири оттурисида йүз бәргән тоқунушта 50 әтрапида сақчи яриланған иди. Тоқунуш хитай сақчилириниң, райондики бир карханиниң шәһәрниң һава вә сүйини булғаватқанлиқиға наразилиқ билдүрүп намайиш өткүзгән асаслиқи аяллар вә яшанған кишиләрдин тәшкил тапқан 200 әтрапида намайишчини тарқитиши җәрянида яшанған икки аялниң өлгәнлики сәвәбидин келип чиққан.

Ройтрес агентлиқиниң хәвәр қилишичә, бәш йил қамақ җазасиға һөкүм қилинған лю хүйруңниң аяли, һечким сотниң һөкүмини қобул қилмайду. Сотниң һөкүми тоғра әмәс. Һөкүмәт мәсилини җимиқтуруш үчүн сотқа бундақ адаләтсиз бир һөкүм чиқарғузди дегән һәмдә сотниң һөкүмигә наразилиқ билдүрүш үчүн алий сотқа әрз сунидиғанлиқини баян қилған.

Йеқинқи йилларда хитайда һөкүмәт органлиридики чириклик, бай вә кәмбәғәлләр оттурисида күнсери көпийиватқан пәрқ вә муһитниң булғиниши һәмдә һөкүмәт хадимлириниң деһқанларниң йәрлиригә һәқсиз игә болувелиши қатарлиқ қилмишларға қарши кәң көләмлик намайишлар елип берилмақта. Хитай рәсмий мәтбуатиниң хәвиригә асасланғанда, хитайда 2003 ‏- йили 16000 наразилиқ һәрикити вә 2004‏- йили чоң ‏-кичик болуп, 74 миң қетим наразилиқ һәрикити мәйданға кәлгән. (Қанат)