Xitay hökümiti namayishchilarni qamaq jazasigha höküm qildi

Lenshi sheherlik soti, ötken yili jéjyang ölkisi dungyang shehiride élip bérilghan naraziliq herikitini teshkilligen dep eyiblen'gen üch kishini bir yildin 5 yilghiche qamaq jazasigha höküm qildi.

Ötken yili aprilda, jéjyang ölkisining dungyang shehiride minglighan namayishchi bilen xitay saqchiliri otturisida yüz bergen toqunushta 50 etrapida saqchi yarilan'ghan idi. Toqunush xitay saqchilirining, rayondiki bir karxanining sheherning hawa we süyini bulghawatqanliqigha naraziliq bildürüp namayish ötküzgen asasliqi ayallar we yashan'ghan kishilerdin teshkil tapqan 200 etrapida namayishchini tarqitishi jeryanida yashan'ghan ikki ayalning ölgenliki sewebidin kélip chiqqan.

Roytrés agéntliqining xewer qilishiche, besh yil qamaq jazasigha höküm qilin'ghan lyu xüyrungning ayali, héchkim sotning hökümini qobul qilmaydu. Sotning hökümi toghra emes. Hökümet mesilini jimiqturush üchün sotqa bundaq adaletsiz bir höküm chiqarghuzdi dégen hemde sotning hökümige naraziliq bildürüsh üchün aliy sotqa erz sunidighanliqini bayan qilghan.

Yéqinqi yillarda xitayda hökümet organliridiki chiriklik, bay we kembegheller otturisida künséri köpiyiwatqan perq we muhitning bulghinishi hemde hökümet xadimlirining déhqanlarning yerlirige heqsiz ige boluwélishi qatarliq qilmishlargha qarshi keng kölemlik namayishlar élip bérilmaqta. Xitay resmiy metbu'atining xewirige asaslan'ghanda, xitayda 2003 ‏- yili 16000 naraziliq herikiti we 2004‏- yili chong ‏-kichik bolup, 74 ming qétim naraziliq herikiti meydan'gha kelgen. (Qanat)