Бейҗиңлиқ мутәхәссис лу җәнхуа 20 йиллиқ қамақ җазасиға һөкүм қилинди

Җоңгу кишилик һоқуқ вә демократийә учур мәркизиниң сәйшәнбә күни ашкарилишичә, хоңкоңлуқ мухбир чең шаң дилосиға мунасивәтлик дәп қаралған, җоңго иҗтимаий пәнләр академийисиниң мутәхәссиси лу җәнхуа, хитай даирилири тәрипидин 20 йиллиқ қамақ җазасиға һөкүм қилинған.

Кишилик һоқуқ вә демократийә учур мәркизиниң билдүришичә, бейҗиң шәһәрлик иккинчи оттура хәлқ сот мәһкимиси, лу җәнхуани "дөләт мәхпийәтликини ашкарилиған" дегән җинайәт билән әйиблигән, лу җәнхуа сотта өзини ақлаш үчүн адвукат тәклип қилмиған.

Лу җәнхуаниң аяли, истансимизниң зияритини қобул қилип "бу дило, баштин ахир наһайити әхмиқанилиқ билән турғузулди, лу җәнхуаниң җинайити пүтүнләй ойдурулған, чүнки мән униң қандақ бир адәм икәнликини толуқ чүшинимән" деди. Лу җәнхуаниң аяли сөзидә йәнә "мән йолдишимни қутулдуруш үчүн пүтүн күчүм билән тиришчанлиқ көрситимән, лекин чоң қуруқлуқта иш қилиш интайин қейин", деди.

Хоңкоң әдәбият университетиниң, асия - тинч окян тәтқиқатчиси ваң юҗин "лу җәнхуаниң делоси әслидә чең шаңниң дилоси билән бирликтә бир тәрәп қилиниши керәк иди, һазир бу икки дило бир - биридин айрилди, дилоға мунасивәтлик икки адәм бир - бири үстидин һечқандақ испат берәлмәйду, шуңа бу сот һөкүми адил һесабланмайду" деди. Хоңкоңлуқ мухбир чең шаң бу йилниң башлири, хитай тәрипидин "җасус " дәп елан қилинип, 5 йиллиқ қамақ җазасиға һөкүм қилинған болуп, хитай һөкүмити лу җәнхуани чең шаң арқилиқ чәтәлгә дөләт мәхпийәтликини ашкарлайдиған материялларни йоллиған дәп әйибләп, өткән йили қолға алған.

Лу җәнхуаниң аялиниң ейтишичә, һөкүмәт лу җәнхуани қолға елип, та униң үстидин һөкүм чиқарғанға қәдәр уни аилисидикиләр билән көрүштүрмигән. (Әқидә)