Béyjingliq mutexessis lu jenxu'a 20 yilliq qamaq jazasigha höküm qilindi

Jonggu kishilik hoquq we démokratiye uchur merkizining seyshenbe küni ashkarilishiche, xongkongluq muxbir chéng shang dilosigha munasiwetlik dep qaralghan, jonggo ijtima'iy penler akadémiyisining mutexessisi lu jenxu'a, xitay da'iriliri teripidin 20 yilliq qamaq jazasigha höküm qilin'ghan.

Kishilik hoquq we démokratiye uchur merkizining bildürishiche, béyjing sheherlik ikkinchi ottura xelq sot mehkimisi, lu jenxu'ani "dölet mexpiyetlikini ashkarilighan" dégen jinayet bilen eyibligen, lu jenxu'a sotta özini aqlash üchün adwukat teklip qilmighan.

Lu jenxu'aning ayali, istansimizning ziyaritini qobul qilip "bu dilo, bashtin axir nahayiti exmiqaniliq bilen turghuzuldi, lu jenxu'aning jinayiti pütünley oydurulghan, chünki men uning qandaq bir adem ikenlikini toluq chüshinimen" dédi. Lu jenxu'aning ayali sözide yene "men yoldishimni qutuldurush üchün pütün küchüm bilen tirishchanliq körsitimen, lékin chong quruqluqta ish qilish intayin qéyin", dédi.

Xongkong edebiyat uniwérsitétining, asiya - tinch okyan tetqiqatchisi wang yujin "lu jenxu'aning délosi eslide chéng shangning dilosi bilen birlikte bir terep qilinishi kérek idi, hazir bu ikki dilo bir - biridin ayrildi, dilogha munasiwetlik ikki adem bir - biri üstidin héchqandaq ispat bérelmeydu, shunga bu sot hökümi adil hésablanmaydu" dédi. Xongkongluq muxbir chéng shang bu yilning bashliri, xitay teripidin "jasus " dep élan qilinip, 5 yilliq qamaq jazasigha höküm qilin'ghan bolup, xitay hökümiti lu jenxu'ani chéng shang arqiliq chet'elge dölet mexpiyetlikini ashkarlaydighan matériyallarni yollighan dep eyiblep, ötken yili qolgha alghan.

Lu jenxu'aning ayalining éytishiche, hökümet lu jenxu'ani qolgha élip, ta uning üstidin höküm chiqarghan'gha qeder uni a'ilisidikiler bilen körüshtürmigen. (Eqide)