Қара хумдан вәқәсигә четишлиқ баш җинайәтчи өлүм җазасиға һөкүм қилинди

Хитайда йүз бәргән " қара хумдан" қуллар вәқәсидә уруп өлтүрүлгән ишчиниң дилосиға бивастә четишлиқ җинайәтчи өлүм җазасиға һөкүм қилинди.

Мәтбуатларниң күчлүк диққитини чәккән, хитайниң шәнши өлкисидә йүз бәргән " қара хумдан " вәқәсиниң йүз беришигә мунасивәтлик дәп қаралған шәнши өлкилик һөкүмәт органлиридики бир қисим хадимлар йеқинда мәсулийитигә қарап, җазаға тартилған иди.

Бирләшмә агентлиқ сәйшәнбә күни шәнши өлкилик али сот мәһкимисиниң муавин башлиқиниң сөзини нәқил кәлтүрүп, қара хумдан" вәқәсидики баш җинайәтчи җав йәнбиңниң " мәдикарларни кишилик әркинликтин мәһрум қалдуруп, вәһши вастиләрни ишлитип, уларни қуллуқ түзүм буйичә мәҗбурий әмгәккә салған" дегән җинайәт билән өлүм җазасиға тартилғанлиқини, ишчиларни көтирәгә елип ишлитишкә мәсул болған җинайәтчи хең тиңхәнниң мүддәтсиз қамақ җазасиға, дилоға мунасивәтлик җинайәтчи ваң биңбиңниң 9 йиллиқ қамақ җазасиға һөкүм қилинғанлиқини елан қилди. Сот мәһкимисиниң мәсули йәнә, бу үч җинайәтчиниң әрз қилиш ‏- қилмаслиқиниң һазирчә мәлум әмәсликини тәкитлигән.

Хитай мәтбуатлириниң хәвәрлиригә асасланғанда, йеқиндин буян хитай сақчи даирилири зор көләмдә һәрикәт қозғап нәччә йүз ишчи хорланған " қара хумдан " вәқәсигә четишлиқ дило үстидин тәкшүрүш хизмитини күчәйткән. (Әқидә)