Qara xumdan weqesige chétishliq bash jinayetchi ölüm jazasigha höküm qilindi

Xitayda yüz bergen " qara xumdan" qullar weqeside urup öltürülgen ishchining dilosigha biwaste chétishliq jinayetchi ölüm jazasigha höküm qilindi.

Metbu'atlarning küchlük diqqitini chekken, xitayning shenshi ölkiside yüz bergen " qara xumdan " weqesining yüz bérishige munasiwetlik dep qaralghan shenshi ölkilik hökümet organliridiki bir qisim xadimlar yéqinda mes'uliyitige qarap, jazagha tartilghan idi.

Birleshme agéntliq seyshenbe küni shenshi ölkilik ali sot mehkimisining mu'awin bashliqining sözini neqil keltürüp, qara xumdan" weqesidiki bash jinayetchi jaw yenbingning " medikarlarni kishilik erkinliktin mehrum qaldurup, wehshi wastilerni ishlitip, ularni qulluq tüzüm buyiche mejburiy emgekke salghan" dégen jinayet bilen ölüm jazasigha tartilghanliqini, ishchilarni kötirege élip ishlitishke mes'ul bolghan jinayetchi xéng tingxenning müddetsiz qamaq jazasigha, dilogha munasiwetlik jinayetchi wang bingbingning 9 yilliq qamaq jazasigha höküm qilin'ghanliqini élan qildi. Sot mehkimisining mes'uli yene, bu üch jinayetchining erz qilish ‏- qilmasliqining hazirche melum emeslikini tekitligen.

Xitay metbu'atlirining xewerlirige asaslan'ghanda, yéqindin buyan xitay saqchi da'iriliri zor kölemde heriket qozghap nechche yüz ishchi xorlan'ghan " qara xumdan " weqesige chétishliq dilo üstidin tekshürüsh xizmitini kücheytken. (Eqide)