Хитайда җамаәт хәвпсизлики әң җиддий мәсилә дәп қаралмақта


2006.12.18

Хитай партийә мәктипи тәрипидин һөкүмәт әрбаблири арисида елип берилған рай синаш нәтиҗисигә қариғанда, хитай һөкүмәт әрбаблири җамаәт хәвпсизликини хитайда мәвҗут әң җиддий иҗтимаий мәсилә дәп қарайдикән.

Рай синашқа қариғанда, хитайдики һөкүмәт әрбаблириниң 6,36 пирсәнти җамаәт хәвпсизликини 2.23 Пирсәнти болса хитай пуқралири арисида күнсери көпийиватқан тапавәт пәрқини әң җиддий мәсилә дәп қарайдикән. Бундин бурун елип берилған рай синашларда хитай пуқралири оттурисида күнсери чоңийватқан кирим пәрқи хитайдики әң муһим иҗтимаий мәсилә дәп көрситилгән иди.

Бу қетимқи рай синаш нәтиҗисигә қариғанда, чириклик хитайдики әң муһим үчинчи мәсилә дәп көрситилгән. Чирикликтин кейин, ишсизлиқ, районлар арисидики тәрәққият баравәрсизлики, давалиниш чиқимлириниң еғирлиқи, оқуш пурсәтлиридики тәңсизлик қатарлиқ мәсилиләр хитайдики әң муһим иҗтимаий мәсилиләр қатарида көрситилгән.

Сиясий мулаһизичиләрниң ейтишичә, хитай коммунистик партийә рәһбәрлирини тәрбийиләйдиған әң алий мәктәп һесабланған, партийә мәктипи тәрипидин елип берилған рай синашта, җамаәт хәвпсизликиниң хитайдики әң җиддий иҗтимаий мәсилә дәп көрситилгәнлики, хитайниң һәр қайси өлкилири, вилайәт- шәһәрлири вә наһийә вә йезилирида һөкүмәт вә һөкүмәт әрбаблириға қарши елип бериливатқан наразилиқ намайишлириниң, хитай рәһбәрлирини қанчилик чүчүтүватқанлиқиниң очуқ ипадиси икән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.