Xitayda jinsiy nisbet perqi chongaymaqta

Nöwette xitaydiki jinsiy nisbet perqi barghanséri chongiyiwatqan bolup, bu xitayning nopus ékologiyisige chong tesir körsetmekte. Shundaqla bu perq mushu sür'et bilen dawamlishiwerse, 2020‏- yiligha kelgende xitayda texminen 24 milyon er boytaq qalidiken.

Shinxu'a agéntliqining xewiride körsitilishiche, bu ehwal xitay emeldarlirini hökümetni bu mesilige nispeten jiddiy mu'amile qilishqa chaqirishqa ündigen. Statistikigha qarighanda, xitayda hazir qizlar bilen oghullarning nisbiti 119:100 bolup, bu birleshken döletler teshkilatining asasiy ölchimidiki 103:100 nisbettin köp yuqiri bolghan.

Béyjing uniwérsitétining nopus mutexessisi mu gu'angzung, xitayda tughulghan bowaqlardiki jinsiy nisbet perqining 80‏- yillardin bashlap chongiyishqa bashlap, hazir nopus ékologiyiside qizil reqem körülüshtek xeterlik ehwalgha kélip qalghanliqini bildürgen.

Xitayning nopus siyasitige mes'ul dölet kabénti ezasi xu'a jyenming xitay emeldarlirigha bu heqte jiddiy chaqiriq otturigha qoyup, " xelqqe, döletke we tarixqa küchlük mes'uliyetchan bolush rohi bilen jinsiy nisbet perqi mesilisini bir chong mesile dep qarap, uni muhim ishlar kün tertipige qoyayli" dégen.

Xitayda jinsiy nisbet perqining chong bolup kétishi, asasliqi xitaylarning oghul bowaqlarni etiwa körüshi sewebidin kélip chiqqan. Shu sewebtin xitayda hazir doxturxanilarning hamildar ayallargha hamilisining qiz-oghullighini éytip bérishi cheklendi. (Peride)