Xitayning tangshen rayonidiki kömür kan weqeside ölgenler 87 ge yetti

Xitayning tangshen rayonidiki lyu gu'entun kömür kénida yüz bergen gaz partlash weqeside ölgenler jüme kün'giche 87 ge yetti.

Xitayning hökümet zuwani shinxu'a axbarat agéntliqining xewer qilishiche, qutquzush xadimliri 87 ishchining ölgenlikini ispatlighan, da'iriler qalghan 21 neper ishchining dawamliq iz dérikini qilmaqta. Partlash weqesi charshenbe küni yüz bergen, xitay metbu'atliri peyshenbe kün'giche 74 kishining ölgenlikini jakarlighan idi. Da'iriler, hazirghiche iz dérikini alalmighan kan astidiki qalghan 21 neper ishchining tirik qutulush mumkinchiliki barghanche azaymaqta, dep qarighan.

Xitay tashqi ishlar ministirliqi peyshenbe küni élan qilghan bayanatida kanchilarni ishlepchiqirishni qoghliship bixeterlik belgilimilirige sel qarighan, dep eyiblidi. Bu weqe ikki heptige barmighan waqit ichide xitay kömür kanlirida yüz bergen 3 - chong weqe bolup hésablinidu.

Xitay hökümitining siyasitini tenqid qilghuchilar, béyjing da'iriliri kömürkan ishchilirining musteqil ishchilar uyushmiliri qurup, öz menpe'etini qoghdishigha yol qoyghandila, andin bu paji'elerning aldini élish yaki töwen sewiyige chüshürüsh mumkin, dep körsetmekte. (Erkin)