Хенәндики бир көмүр канда өлгән кан ишчилириниң сани аз мәлум қилинған

Хитай даирилири, көмүр кан бихәтәрликини ашуруп, өлүмниң алдини елиш тәдбирлирини күчәйтиш һәққидә җидди чақириқ елип бериватқан бир пәйттә, хенәндики шиән көмүр кан мәсуллириниң сахтилиқ қилмиши ашкарланди.

Хитай дөләт бихәтәр ишләпчиқиришни көзитиш идариси, 11 ‏- феврал күни баянат елан қилип, 2 ‏- феврал күни йүз бәргән кан вәқәсидә әмилийәттә 24 адәмниң өлгәнликини елан қилди.

Хенән шиән көмүр каниниң мәсуллири, 2 ‏- феврал күни йүз бәргән һадисидә аран 7 адәмниң өлгәнлики хәвәр қилған болуп, әслидә һадисидә 24адәм өлгән икән, бирақ көмүр кан мәсуллири 17 адәмниң өлимини қәстән йошуруп, "пәқәт 7адәм өлди" дәп хәвәр бәргән.

Бирақ шинхуа агентлиқиниң мухбири зиярәт қилиш давамида, кан мәсуллириниң ялғанчилиқ қиливатқанлиқини сезип, вәқәни мунасивәтлик орунларға мәлум қилған.

Сақчи даирилириниң тәкшүрүши нәтиҗисидә сахтилиқ қилған кан игиси вә көмүр ишләпчиқириш бөлиминиң башлиқи шуниңдәк башқа бир қанчә бөлүмниң мәсуллиридин 5 киши қолға елинған.

Күзәткүчиләрниң билдүришичә, хитайда көмүр кан бихәтәрлик әслиһәлириниң начарлиқи төпәйли, кан ишчилириниң биһудә өлүмлири мәйданға кәлгәндин сирт, кан мәсуллириниң сахтилиқ қилиши нәтиҗисдә кан ишчилириниң җәсәтлири йоқап кетиштәк әһваллар интайин көп йүз беридикән. (Әқидә)