Сәуди әрәбистан падишаһи бейҗиңда хитай билән келишим имзалиди
2006.01.23
Хитайни зиярәт қиливатқан сәуди әрәбистанниң падишаһи абдулла 23 - январ күни бейҗиңда хитай дөләт рәиси хуҗинтав билән көрүшти. Шинхуа агентлиқиниң хәвәр қилишичә, сәуди әрәбистан вә хитай рәһбәрлири икки дөләт оттурисидики мунасивәтләрни техиму тәрәққи қилдуруш мәсилиси үстидә сөһбәтләшкән.
Сәуди әрәбистан падишаһи абдулланиң хитай зиярити җәрянида, хитай билән сәуди әрәбистан оттурисида енергийә саһәсидә һәмкарлиқ келишими имзаланған. Франсийә агентлиқиниң хәвәр қилишичә, 23 - январ күни бейҗиңда, сәуди әрәбистан нефит министири вә хитай дөләт тәрәққият вә ислаһат комитети рәиси тәрипидин имзаланған һәмкарлиқ келишими, икки дөләтниң нефит, тәбий газ вә рода саһәсидә һәмкарлишишини өз ичигә алидикән.
Хәвәрдә ейтилишичә, икки дөләт оттурисида имзаланған келишим һәққидә тәпсили мәлумат берилмигән. Әмма сәуди әрәбистан ташқи ишлар министири шаһзадә сәуд әлфәйсәл, келишимниң имзалиниш мурасимидин бурун бәргән баянатида, бу келишим кәлгүсидә икки дөләтниң енергийә саһәсидә йеқиндин һәмкарлишишиға шараит һазирлап бериду, деди
Енергийә мутәхәссислири, сәуди әрәбистан билән хитай оттурисида имзаланған келишимниң икки дөләт енергийә саһәсидә һәмкарлиқ тоғрисида имзалиған тунҗи келишим икәнликини билдүрмәктә.
Сәуди әрәбистан дунядики нефит експорт қилидиған әң чоң дөләт, хитай болса нефит импорт қилидиған иккинчи чоң дөләт һесаблиниду. Хәвәрләргә қариғанда, хитай өткән йили сәуди әрәбистандин 20 милйон тоннидин көп нефит импорт қилған. (Қанат)
Мунасивәтлик мақалилар
- Сәуди әрәбистан падишаһи хитайни зиярәт қилиду
- Түркмәнистан билән хитай келәр йили муһим бир нефит келишимини имзалимақчи
- Русийә баш министириниң хитайдики зиярити ахирлашти
- Хитай ширкитиниң ексан мобилни сетивелиш тәклипи рәт қилинди
- Хитай компартийиси 16 - қурултийиниң 5 - омуми йиғини енергийә кризиси музакирә қилди