Se'udi erebistan padishahi béyjingda xitay bilen kélishim imzalidi


2006.01.23
Share on WhatsApp
Share on WhatsApp

Xitayni ziyaret qiliwatqan se'udi erebistanning padishahi abdulla 23 ‏- yanwar küni béyjingda xitay dölet re'isi xujintaw bilen körüshti. Shinxu'a agéntliqining xewer qilishiche, se'udi erebistan we xitay rehberliri ikki dölet otturisidiki munasiwetlerni téximu tereqqi qildurush mesilisi üstide söhbetleshken.

Se'udi erebistan padishahi abdullaning xitay ziyariti jeryanida, xitay bilen se'udi erebistan otturisida énérgiye saheside hemkarliq kélishimi imzalan'ghan. Fransiye agéntliqining xewer qilishiche, 23 ‏- yanwar küni béyjingda, se'udi erebistan néfit ministiri we xitay dölet tereqqiyat we islahat komitéti re'isi teripidin imzalan'ghan hemkarliq kélishimi, ikki döletning néfit, teb'iy gaz we roda saheside hemkarlishishini öz ichige alidiken.

Xewerde éytilishiche, ikki dölet otturisida imzalan'ghan kélishim heqqide tepsili melumat bérilmigen. Emma se'udi erebistan tashqi ishlar ministiri shahzade se'ud elfeysel, kélishimning imzalinish murasimidin burun bergen bayanatida, bu kélishim kelgüside ikki döletning énérgiye saheside yéqindin hemkarlishishigha shara'it hazirlap béridu, dédi

Énérgiye mutexessisliri, se'udi erebistan bilen xitay otturisida imzalan'ghan kélishimning ikki dölet énérgiye saheside hemkarliq toghrisida imzalighan tunji kélishim ikenlikini bildürmekte.

Se'udi erebistan dunyadiki néfit éksport qilidighan eng chong dölet, xitay bolsa néfit import qilidighan ikkinchi chong dölet hésablinidu. Xewerlerge qarighanda, xitay ötken yili se'udi erebistandin 20 milyon tonnidin köp néfit import qilghan. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.