Xitay bilen fransiye 14 xil hemkarliq kélishimi tüzdi

Fransiye prézidénti jak shirak peyshenbe küni béyjingda, xitay dölet re'isi xu jintaw bilen körüshüp, ikki dölet otturisida tüzülgen 14 türlük hemkarliq kélishimige qol qoydi.

Fransiye agéntliqining bu heqte bergen xewirige qarighanda, ikki terep otturisida maqullan'ghan kélishimname ichide , fransiyining xitaygha A 320 we A350 tipliq yoluchilar ayrupilani yasap bérishi heqqidiki kélishimnamimu bar bolup, buning qimmiti 1 milyard amérika dollirigha yétidiken.

Bu qétimqi uchrishishta shirak bilen xu jintaw birleshme bayanat élan qilip, yawrupa birlikining xitaygha bérilgen qoral ‏- yaraq imbargosining tézraq bir terep bolushini ümid qilidighanliqini bildürüshti.

Ikki terep yene, shimaliy koriye yadro qoralliri mesilisini qandaq bir terep qilish we ortaq küch chiqirip, iranning oran tawlash herikitini toxtitish qatarliq muhim istratégiyiler üstide muzakirileshken.

Xu jintaw bilen shirak arisida imzalan'ghan kélishimde, xitay terep dölet ichidiki kishilik hoquq mesilisni yaxshilap, xelqining eqelli hoquqlardin behrimen bolushigha yol qoyush heqqide wede bergen.

Bu shirakning wezipige teyinlen'gendin béri 4 ‏- qétim xitayni ziyaret qilishi bolup, u peyshenbe küni béyjing uniwérsitétida nutuq sözligen. Shirak xitaydiki ziyaritini shenbe küni ayaqlashturidu. (Eqide)