Xitay hökümiti "térrorchiliqqa qarshi küresh" te özbékistan bilen bir septe ikenlikini bildürdi
2005.05.26
Özbékistan prézidénti islam kerimof xitaydiki ziyaritini dawamlashturiwatqan bir peytte, xitay hökümiti bayanat élan qilip, " térrorchiliqqa qarshi küresh" te özbékistan bilen bir septe turidighanliqini bildürdi.
Xitay tashqi ishlar ministirliqining bayanatchisi kung chü'en bayanatida, " sherqiy türkistan bölgünchiliri xitay térritoriyiside nurghun weqelerni tughdurdi. Özbékistan hökümiti bu mesilide xitay hökümitining meydanini toluq chüshinip qollidi. Biz térrorchiliqqa qarshi heriketlerde munasiwetlik döletler bilen hemkarliqni kücheytishni xalaymiz" - dédi.
Fransiye axbarat agéntliqining analizchilarning sözini neqil keltürüshiche, özbékistan xitay hökümitining Uyghur musteqilchilirini basturush siyasitini yürgüzüshide intayin muhim rol oynaydiken.
Özbékistan prézidénti islam kerimof charshenbe küni xitaygha qilghan ziyaritini bashlighan bolup, u peyshenbe küni xitay bash ministiri win jyabaw bilen körüshken. Nurghun chet'el metbu'atliri kerimofning enjandiki qanliq weqedin kéyin, xelq'arada yalghuz qélishtin saqlinish üchün, xitayni ziyaret qilghanliqini bildürgen.
Bu arida, shimaliy atlantik ehdi teshkilati we amérika özbékistan hökümitige qaratqan bésimni kücheytti. Ular özbékistandin 13 - may küni enjanda yüz bergen qanliq weqe üstidin xelq'araliq tekshürüsh élip bérishni telep qildi. Weqening shahidliri enjandiki toqunushta hökümet da'irilirining puqralargha oq chiqirip, minggha yéqin ademning ölishini keltürüp chiqarghanliqini bildürgen. Emma kerimof hökümiti buni ret qilip, weqede ölgen 169 kishining köpinchisining " térrorchi" lar ikenlikini körsetken idi.
Merkizi amérikidiki xelq'ara kishilik hoquqni közitish teshkilatimu peyshenbe küni bayanat élan qilip, özbékistan hökümitini enjandiki weqening heqiqitini yoshurdi dep eyiplidi hemde xelq'ara jem'iyetni özbékistan'gha bésim ishlitip, bu weqe üstidin tekshürüsh élip bérishni telep qildi. (Arzu)