Хитайда бай - кәмбәғәлләрниң кирим пәрқий агаһландуруш дәриҗисигә йәтти

Хитай дөләт тәрәққият вә ислаһат комитети доклат елан қилип, хитай бойичә шәһәр пуқралириниң бай- кәмбәғәллик пәрқий әң юқири чәккә йетип барғанлиқини җакарлиди.

Ройтерс ахбарат агентлиқиниң әскәртишичә, дөләт тәрәққият вә ислаһат комитети, шәһәр пуқралириниң кирим тәқсимат пәрқидики тәңпуңсизлиқлар үстидин елип барған тәкшүрүш доклатида, бай -кәмбәғәллик пәрқи җуңго шәһәрлиридә " мувапиқ болмиған" әң юқири чәккә йетип барди, дәп хуласә чиқарған.

Доклатта көрситилишичә, хитай шәһәрлиридә кирими әң төвән болған 5 тин бир қисим нопусниң тапавити омуми киримниң аран 75.2 Пирсәнтини игиләйдикән. Шуниң билән биргә хитай шәһәрлиридики кирими әң юқири болған 5 тин бир қисим нопусниң тапавити буниңдин 20 һәссә көп икәнлики елан қилинди. Доклатта, бу әһвал хитай җәмийитиниң иҗтимаий муқимлиқини сақлаш мәсилисидә қийинчилиқ туғдүрүп, хитай сиясәт бәлгүлигүчилирини қайғуға салмақта, дәп тәкитлигән.

Хитай хәлқ қурултийиниң бу йил 3 - айда чақирилидиған мәмликәтлик йиғини, хитай һөкүмитиниң йеңи бәш йиллиқ пиланини тәстиқлиши мүмкин. Йеңи бәш йиллиқ пиланда тәңпуң җәмийәт қуруш мәсилиси тәкитләнсиму, әмма хитай даирилири һөкүмәтниң диққити шәһәрләр билән йезилар оттурисидики пәрқни азайтишқа қаритилидиғанлиқини билдүрмәктә. Хитай баш министири вен җябав йеқинда һөкүмәтниң тиббий давалаш вә иҗтимаий параванлиқ шараитини яхшилайдиғанлиқини вәдә қилған. Бу мәсилиләр хитайда һәр хил наразилиқ һәрикәтлири вә тоқунушларниң әвҗ елишини кәлтүрүп чиқармақта иди.

Шинхуа ахбарат агентлиқиниң нәқил кәлтүрүшичә, хитай дөләт тәрәққият вә ислаһат комитетиниң исмини ашкарилимиған бир әмәлдари, һөкүмәтниң алдимиздики йилларда тапавәт пәрқини тәңшәш йолида җиддий тәдбир алидиғанлиқини билдүргән. Әмма бу тәдбирниң тәпсилатлирини ашкарилимиған. (Әркин)