Xitayda bay - kembeghellerning kirim perqiy agahlandurush derijisige yetti

Xitay dölet tereqqiyat we islahat komitéti doklat élan qilip, xitay boyiche sheher puqralirining bay- kembeghellik perqiy eng yuqiri chekke yétip barghanliqini jakarlidi.

Roytérs axbarat agéntliqining eskertishiche, dölet tereqqiyat we islahat komitéti, sheher puqralirining kirim teqsimat perqidiki tengpungsizliqlar üstidin élip barghan tekshürüsh doklatida, bay -kembeghellik perqi junggo sheherliride " muwapiq bolmighan" eng yuqiri chekke yétip bardi, dep xulase chiqarghan.

Doklatta körsitilishiche, xitay sheherliride kirimi eng töwen bolghan 5 tin bir qisim nopusning tapawiti omumi kirimning aran 75.2 Pirsentini igileydiken. Shuning bilen birge xitay sheherliridiki kirimi eng yuqiri bolghan 5 tin bir qisim nopusning tapawiti buningdin 20 hesse köp ikenliki élan qilindi. Doklatta, bu ehwal xitay jem'iyitining ijtima'iy muqimliqini saqlash mesiliside qiyinchiliq tughdürüp, xitay siyaset belgüligüchilirini qayghugha salmaqta, dep tekitligen.

Xitay xelq qurultiyining bu yil 3 - ayda chaqirilidighan memliketlik yighini, xitay hökümitining yéngi besh yilliq pilanini testiqlishi mümkin. Yéngi besh yilliq pilanda tengpung jem'iyet qurush mesilisi tekitlensimu, emma xitay da'iriliri hökümetning diqqiti sheherler bilen yézilar otturisidiki perqni azaytishqa qaritilidighanliqini bildürmekte. Xitay bash ministiri wén jyabaw yéqinda hökümetning tibbiy dawalash we ijtima'iy parawanliq shara'itini yaxshilaydighanliqini wede qilghan. Bu mesililer xitayda her xil naraziliq heriketliri we toqunushlarning ewj élishini keltürüp chiqarmaqta idi.

Shinxu'a axbarat agéntliqining neqil keltürüshiche, xitay dölet tereqqiyat we islahat komitétining ismini ashkarilimighan bir emeldari, hökümetning aldimizdiki yillarda tapawet perqini tengshesh yolida jiddiy tedbir alidighanliqini bildürgen. Emma bu tedbirning tepsilatlirini ashkarilimighan. (Erkin)