Xitay yazghuchisi shitaw dölet mexpiyetlikini ashkarilash jinayiti bilen qolgha élindi

Xitay hökümiti, musteqil xitay yazghuchiliri qelemkeshler jem'iyitining ezasi, muxbir we yazghuchi shitawni 24 - öktebir küni " dölet mexpiyetlikini ashkarilash "jinayiti bilen eyiblep qolgha alghan.

Amérika awazi radi'osining xewirige qarighanda, shitaw shenshi ölkisi teyyü'en sheherlik jama'et xewpsizlik tarmaqliri teripidin élip kétilgendin kiyin, a'ile tawabi'atliri hazirghiche xewirini alalmighan.

Xewerge qarighanda, shitaw ilgiri "qanun kündilik géziti" qatarliq xitaydiki bir nechche chong gézitxanilarda wezipe ötigen. Yéqinqi yillardin buyan, u izchil türde chet'eldiki intérnét torida tarqitilidighan "démokratiye munbiri "zh'orniligha maqale ewetken.

Uning inisi, shitawning dölet mexpiyetlikini igilesh imkaniyiti peqetla yoq ikenlikini, uning qolgha élinishi chet'eldiki tor betlirige maqale ewetkenliki bilen munasiwetlik bolishi mumkinlikini bildürdi.

Xitay hökümiti da'im "dölet mexpiyetlikini ashkarilash jinayiti" dégen nam bilen siyasi köz qarishi oxshash bolmighan kishilerni basturidu. Xitay hökümiti ilgiri Uyghur tijaretchisi rabiye qadir xanimnimu, amérikidiki yoldishigha yerlik gézit ewetkenlikini bahane qilip, "dölet mexpiyetlikini ashkarilash jinayiti " bilen sekkiz yilliq qamaq jazasigha höküm qilghan idi. (Arzu)