Kishilik hoquq közitish teshkilati xitayning diniy erkinlikni dawamliq boghuwatqanliqini körsetti

Amérikidiki kishilik hoquq közitish teshkilati charshenbe küni xitay ötken yili yolgha qoyghan diniy erkinlikni qoghdash yéngi belgilimiliridin buyanqi bir yilliq weziyetke baha bérip, xitay hökümitining kishilerning diniy erkinlikini dawamliq boghuwatqanliqini körsetti.

Mezkur teshkilat bu heqtiki doklatida yene, xitaydiki xiristi'an dini we falun'gong qatarliq her xil dinlar cheklimige uchrapla qalmastin, Uyghur musulmanliri we tibet buddistlirining diniy erkinlikimu bölgünchilikke baghlap basturulidighanliqini eskertken.

Doklatta yene, béyjing hökümitining Uyghur musulmanlirigha tutqan pozitsiyisining téximu qattiq boluwatqanliqi, chünki xitayning buni qesten xelq'ara térrorchiliqqa baghlap turup basturuwatqanliqi éytilghan.

Gerche xitay hökümiti ötken yili yolgha qoyghan diniy erkinlikni qoghdash yéngi belgilimiliri arqiliq , kishilerning diniy erkinlikini qoghdash jehette zor netijilerni qolgha keltürgenlikini jar salsimu, lékin kishilik hoquq közitish teshkilati bu belgilime yolgha qoyulghandin buyanqi bir yilliq weziyetni közitish arqiliq, bu belgilimining xitaydiki diniy erkinlik weziyitide héchqandaq yaxshilinish peyda qilmighanliqini yekünlidi. (Peride)