Ч м т: олимпиккә аз қалған болсиму, хитай кишилик һоқуқи әһвалида өзгириш болмиди


2007-07-27
Share

Хәлқара чигрисиз мухбирлар тәшкилати пәйшәнбә күни баянат елан қилип, бейҗиң олимпик мусабиқиси йетип келишкә аз қалған болсиму, лекин хитай кишилик һоқуқи хатирисидә яхшилиниш болмиғанлиқини, хитай һөкүмити ички моңғулийә, уйғур или вә тибәт қатарлиқ җайларда давамлиқ бастуруш сиясити йүзгүзиватқанлиқини әйиплиди.

Баянатта йәнә, хитай даирилирини түрмидики ички моңғолийилик өктичи зат хадани қоюп беришкә чақирди. Хада ички моңғулийә хәлқиниң миллий һоқуқини қоғдиғучи мухбирлардин болуп, у 1996 - йили " дөләт мәхпийәтликини оғурлаш вә бөлгүнчилик" билән әйибләп 15 йиллиқ қамақ җазасиға һөкүм қилинған. Хәлқара кәчүрүм тәшкилати хадани моңғул мәдәнийитини қоғдап қелиш үчүн күрәш қилған " виждан мәһбуси", дәп атимақта.

Чигрисиз мухбирлар тәшкилати баянатта йәнә мундақ дәйду, " бейҗиң олимпик йиғининиң ' бир дуня, бир ғайә,' дегән шуари, етник милләтләр һоқуқини қоғдаштики бир синақтур." Доклатта йәнә," даириләрниң рәт қилишиға қаримай, ички моңғулийә, уйғур или вә тибәт қатарлиқ ишғалийәт астидики районларда йәрлик хәлқниң кишилик һоқуқи үзликсиз дәпсәндичиликкә учримақта," дәйду.

Чигрисиз мухбирлар тәшкилатиниң асия - тинч окян райони мәсули бероселниң әскәртишичә, "бейҗиң олимпик мусабиқисиға бир йил қалған болсиму, лекин хитай һөкүмити вә бейҗиң олимпик мусабиқисини тәшкиллигүчиләр хәлқара җәмийәткә бәргән вәдилириниң көп қисимини ада қилмиған." Чигрисиз мухбирлар тәшкилати бу баянатни ички моңғулийә аптоном райони қурулғанлиқини 60 йиллиқи мунасивити билән елан қилди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт