Кишилик һоқуқни көзитиш тәшкилати хитай даирилирини тәнқид қилди


2005.12.08

Кишилик һоқуқни көзитиш тәшкилати пәйшәнбә күни доклат елан қилип, йәрлик һөкүмәт даирилири үстидин бейҗиңға әрз қилип барған әрз - шикайәтчиләрниң хитай һөкүмити тәрипидин уруш, қорқутуш вә гөрүгә елиш қатарлиқ усуллар билән дәпсәндә қилинғанлиқини илгири сүрди.

Кишилик һоқуқни көзитиш тәшкилатиниң тәкитлишичә, хитай һөкүмити бу йилниң башлири әрз - шикайәт қанунини өзгәрткән болсиму, әмма йеңи қанунда әмәлдарларниң әрз- шикайәтчиләргә иғвагәрчилик қилиш вә уларни кәмситиш қилмишлириға чәклимә қоюлмиған. Доклатта әскәртишичә, әрз - шикайәт қилған пуқралар һуҗумға учримақта, таяқ йемәктә вә қорқутулмақта икән.

Доклатта, әрз- шикайәтчиләргә ярдәм қилған кишиләрниңму охшаш тәқдиргә дуч келиватқанлиқини тәкитлигән. Кишилик һоқуқни көзитиш тәшкилатиниң әскәртишичә, бейҗиңға әрз қилип барған пуқраларниң әрз- шикайәт қилиш сәвәблири һәрхил болуп, бу сақчиларниң зораванлиқи, йәр- мүлк һоқуқиниң таҗавузға учриғанлиқи қатарлиқ дилоларни өз ичигә алиду.

Кишилик һоқуқни көзитиш тәшкилатиниң истатистика қилишичә, өткән йили бейҗиң даирилиригә 10 милйон парчә әрз шикайәт хети йезилған болуп, әрз - шикайәтчиләрниң көп қисими деһқанлар икән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.