Li déngxuyning yaponiyidiki shexsiy ziyariti xitayning ghezipini qozghidi

Teywenning sabiq prézidénti li déngxuy 5 ‏- ayning 30 ‏- küni yaponiyini ziyaret qilish üchün seperge atlan'ghanda, ayrupilanda muxbirlargha özining pilanini ashkarilighan.

Roytérs agéntliqining bayan qilishiche, li déngxuy ependi, özining bu qétimqi yaponiye ziyariti 22 ‏ yildin buyanqi tunji qétimliq shexsiy ziyaret bolidighanliqini, bu 11 künlük shexsiy ziyaret jeryanida, tokyoda 'shimpéy goto mukapati' yighinida nutuq sözleydighanliqini, sözide 1898 ‏- yilidin 1906 ‏- yilighiche bolghan waqit ichide yaponiyining teywende turushluq emiri teywenning saqliqini saqlash asasi qurulushigha we zamaniwiylishishigha töhpe qoshqanliqini tilgha alidighanliqini, shundaqla, bu qétimqi shexsiy ziyaret jeryanida yene , yasukuni qebristanliqigha bérip, ikkinchi dunya urushida hayatidin ayrilghan akisi li déngchinning qebrisini yoqlashnimu oylawatqanliqini bayan qilghan.

Xitay tashqi ishlar minisitirliqining bayanatchisi jang yü derhal buninggha inkas qayturup, yaponiye hökümitidin teywen musteqilchilirige sehne hazirlap bermeslikni telep qilghan. B b s ning xewer qilishiche, xitay bayanatchisi jang yü yene ' bölgünchilerning junggo bilen déplomatik munasiwiti bar her qandaq dölette heriket élip bérishigha qet'iy qarshi turimiz' dégen.

Yaponiyining bash minisitiri shinzo abé ' yaponiyini qisqa waqit ziyaret qilidighan teywenlikler üchün wiza béjirish hajet emes, yaponiyide shexsiylerning étiqad we pa'aliyet erkinliki bar, li ependining bu qétimqi shexsiy ziyariti xitay-yaponiye munasiwitige taqashmaydu' dégen. (Weli)