Li jawshing: junggo yadro qorallirini aldi bilen ishletmeydu

Xitay metbu'atlirining xewer qilishiche, jonggo dölet mudapi'e uniwérsitétining ilmiy mudiri général mayor ju chingxu, eger amérika teywen urushigha arlashsa, jonggo amérikigha yadro qorallar bilen zerbe béridu, dep agahlandurghandin kéyin, xitay tashqi ishlar ministiri li jawshing, xitayning yadro qorallirini aldi bilen ishletmeydighanliqini bildürdi.

Li jawshing bu sözlerni peyshenbe küni béyjingda amérika we yaponiyilik mutexessisler ömikini qobul qilip, ju chingxuning sözi jonggo hökümitining meydanigha emes, uning shexsiy köz qarishigha wekillik qilidu, dep tekitligen. Emma li jawshing ju chingxuni tenqid qilmidi. Li jawshingning tekitlishiche, jonggo 1964 - yili tunji yadro qorallar siniqi élip barghandin kéyin, "her qandaq waqit, her qandaq ehwalda aldi bilen yadro qoralliri ishletmeslikke wede bergen."

Li jawshing, bu wedining hazirgha qeder küchke igilikini bildürgen. Emma u , "herqandaq kishi we herqandaq küchning herqandaq usulda teywenni junggodin ayrip chiqip kétishige yol qoymaymiz," dégen.

Jonggo dölet mudapi'e uniwérsitéti, xitay herbiy da'irilirining yuqiri derijilik qomandanlirini yitishtüridighan organ. Shuning üchün ju chingxuning sözi amérika we dunyada küchlük inkas qozghighan idi. Amérika dölet mudapi'e ministiri donald ramsfildning tekitlishiche, juning sözi xitay da'irilirining meydanigha wekillik qilish - qilmasliqini közitishke erziydiken. Ju chingxu, "shi'enning sherqidiki pütün sheherlerning weyran bolushigha tewekkül qilalaymiz," dep tekitligen. (Erkin)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar