Xitay tibette 400 din artuq tibetlikni qolgha alghanliqini élan qildi

Xitay saqchiliri 10 - marttin bashlap tibette élip bérilghan namayishqa alaqidar kishilerni tutqun qilishqa bashlighan bolup, xitay axbarat wasitilirige asaslan'ghanda, hazirche saqchilar namayishni teshkilligüchi gumandarlardin 400din artuq kishini qolgha alghan.

Xewerde körsitishiche, yéqindin buyan 289 adem özini mezkur namayish bilen alaqidar dep melum qilghan bolup, jem'iy 414 neper gumandar qolgha élin'ghan.

Birleshme agéntliqida neqil qilinishiche, tibet jama'et xewpsizlik nazaritining mu'awin naziri jyang zeyping, xitay razwédchiklarning 10 - mart tibette qozghilip 14 ‏ - mart resmiy qanliq toqunushqa aylan'ghan namayishta mes'uliyiti bar gumandarlarni qolgha alghanliqini bildürgen.

Xitay axbarat wasitilirida xewer qilinishiche, tibetning lxasa shehiride yüz bergen qanliq namayishta 1 xitay saqchisini öz ichige alghan 18 adem ölgen bolup, hazir xitay hökümiti qazagha uchrighanlarning a'ile tawabi'atlirigha 200 ming yüen nepiqe puli béridighanliqini jakarlighan.

Emma sürgündiki tibet hökümitining bildürüshiche, xitay saqchilar bilen toqunush jeryanida ölgen tibetlerning sani 140 etrapida bolup, bu xitay hökümiti melum qilghan sandin zor derijide perqlinidiken.

Hazir tibet we qoshna rayonlardiki namayish asasen jimiqturulghan bolsimu, radi'omiz igiligen melumatlargha qarighanda, 29 - mart küni xitayda turushluq chet'el diplomatliri tibette élip barghan 3 künlük ziyaret dawamida yene 100 ge yéqin kishi tibetning lxasa shehiride namayish élip barghan. (Jüme)