Хитайда ишләнгән мәһсулатларниң 5 дән бир қисиминиң өлчәмгә тошмайдиғанлиқи байқалди


2007-07-04
Share

Хитайда сүпәт тәкшүрүш тармақлири хитайда ишләнгән мәһсулатларниң 5 дән бир қисиминиң өлчәмгә тошмайдиғанлиқини ашкарилиған болуп, мәзкур мәһсулатларда зәһәрлик маддилар байқалған.

Ройтерс агентлиқиниң хитай һөкүмәт тор бетидә елан қилинған доклаттин нәқил кәлтүрүшичә, хитай мәркизи сүпәт ‏- техника назарәтчилики, тәкшүрүш ‏- карантин қилиш баш идариси доклатида 7200 хил таварниң 80.9 Пирсәнтиниң тәкшүрүштин өткәнликини вә мәһсулат сүпитиниң үзлүксиз юқири көтириливатқанлиқини оттуриға қойған болсиму, әмма қалған 19.1 Пирсәнт таварларда зәһәрлик маддилар, химийивий қошулмилар, бихәтәрлик вә мәһсулат чүшәндүрүлүшиниң кәм болуш қатарлиқ әһваллар көрүлгән.

Кичик типтики завутларда ишләнгән мәһсулатларда бу хил әһвал бир қәдәр еғир болуп 27.1 Пирсәнткә йәткән.

Доклатта көрситилишичә йәнә, бу тәкшүрүш пәқәт хитай ичидики мәһсулатларға қаритилған болуп, експорт қилинидиған мәһсулатларни оз ичигә алмайдикән.

Бу қетимлиқ тәкшүрүштә 5 дән бир қисим ичимлик лаяқәтсиз чиққан вә химийивий оғут, паразит қурут дорилири, деһқанчилиқ дорилири қатарлиқларниң 19.5 Пирсәнти тәкшүрүштин өтәлмигән.

Униңдин башқа йәнә, қутилиқ ичимлик, мевә мураббалири, су тәңшигүч, қурутулған белиқ қатарлиқ нурғун мәһсулат вә йемәк- ичмәк мәһсулатлирида бактерийә вә юқири дәриҗидики химийивий қошулмилар байқалған.

Бу йил баһардин башлап хитай даирилири америкиға сүпәтсиз вә зәһәрлик маддилардин булғанған һәрхил йемәклик, теббий хуручлар вә балилар оюнчуқлирини експорт қилғанлиқи сәвәблик хитай тәрәп америка һөкүмитиниң әйиблишигә учрап кәлгән.

Хитай америка вә панамаға експорт қилған хитай маллирида зәһәрлик химийивий маддилар байқалғандин кийин хитай мелиға қарита дуняви диққәт қозғалған иди.

Өткән һәптә америка йимәк-ичмәк, дора- дәрмәк башқуруш идариси хитайда беқилған су мәһсулатлирини, зәһәрлик мадда йоқлуғи испатланмиғучә бир туташ киргүзмәйдиғанлиқини җакарлиди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт