Америка хитайниң һәрбий маневириға қатнишишқа йол қоюшини үмид қилди


2006.06.23
Share on WhatsApp
Share on WhatsApp

Америка дөләт мудапиә министирлиқиниң асия - тинч окян ишлири мәсули генерал җон әллен, америка, хитай һәрбий вәкиллирини һәрбий маневирға тәклип қилғандин кейин, хитай тәрәп америкини һәрбий маневирға тәклип қилиши керәк, дәп көрсәтти.

Америка хитайниң бир һәрбий вәкилләр өмикини йеқинда тинч окянниң гуам арили әтрапида өткүзүлгән "җәсур қалқан" намлиқ һәрбий маневирға тәклип қилған вә хитай һәрбий вәкилләр өмики америкиниң "реган" намлиқ авиаматкисини зиярәт қилған.

Шинхуа ахбарат агентлиқиниң хәвәр қилишичә, хитай һәрбий вәкилләр өмики бу қетимқи маневирни көзәткәндин кейин, америкиниң һәрбий һазирлиқлар вә истратегийисигә болған чүшәнчимиз чоңқурлашти, дәп қариған.

Җон әллен, пәйшәнбә күни америка дөләт мәҗлисидики һәрбий испат бериш йиғинида "җуңго һәрбий ишларни ашкарилаштурушни күчәйтипла қалмай, җуңго армийиси йәнә 'бар тавиғим - ян тавиғим' мәнтиқиси бойичә америка һәрбилирини хитай армийисиниң һәрбий маневириға тәклип қилиши керәк" дәйду.

Йиғинда америка ярдәмчи дөләт мудапиә министири петир родман, америка һәрбий ишларни ашкарилаштурушни тәләп қилип хитайға давамлиқ бесим ишлитиду, деди. Родманниң әскәртишичә, әгәр җуңго америкини маневирға тәклип қилмиса, америка хитай һәрбий даирилирини йәнә тәклип қиливәрмәйдикән. У, җуңгониң башқурулидиған бомба, су асти парахот, икки сәп бойичә уруш қилиш, авиаматка, компютир вә суний һәмраға қарши уруш қилиш саһәсидики тәрәққиятиға диққәт қилишқа әрзийду, дәйду. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.